27 июля 2011 г.
ЮРРА-КĔВВЕ тарават Пуянкассинче пурăнакан С.Кувшинов. И.Вдовина репертуарĕнчи пĕр юрра та вăл хăйне майлă шăрантарать:
Кил картине кĕрсен мĕн сас лайăх;
Выльăх-чĕрлĕх сасси лайăх.
Пĕр шутласан, чăннипех çапла мар-и вара; Чăваш эстрада юрăçипе пĕр ятлă, хушаматлă Сергей выльăх-чĕрлĕх йышлă усрать. Унăн «эстради» – витере.
– Паянхи куна вунă сысна пур, – тет вăл. – Сĕтсĕр те ларас килмест – ĕне усратпăр. Пăрусем – иккĕ. Сĕт-çу хамăра та çитет, сутмалăх та юлать.
Сергейĕн Татьяна мăшăрĕ те – ларма-тăма пĕлмен ĕçчен çын. Тепĕр чух ĕç ытларах ун çине тиенет пулин те, çакăншăн вăл пĕрре те ÿпкелешмест.
– Çемье лавне пĕрле туртмалла вĕт, – калаçăва хутшăнчĕ хĕрарăм. – Халĕччен алса-чăлха çыхма çăм туянса курман – сурăхсем те усратпăр. Йышлах мар та – татах ÿстерес тетпĕр.
Кувшиновсен кил картинче хурсем те самаях. Чăх-чĕпсем-и; Вĕсем мĕн чухлĕ пулнине кил хуçисем тĕп-тĕрĕс калама пултараймаççĕ.
Çемьен – икĕ автомашина. Ÿркенменскерсем, кăçал та утă самаях хатĕрлесе хăварнă. Ытлашшипех те. Ахальтен мар Кувшиновсем выльăхсен шутне татах ÿстересшĕн.