03 августа 2011 г.
ÇИТМĔЛ çиччĕре пырать ĕнтĕ Палтиелĕнче пурăнакан Керимулла Хамидуллов. Çавах та ватăласшăн мар-ха ялти хисеплĕ çын, ĕмĕрĕпех тракторпа тата комбайнпа ĕçленĕскер. Алла усса ларма хăнăхман вăл: Керимулла Айметуллович выльăх-чĕрлĕх йышлă усрать.
– Паянхи куна икĕ лаша, виçĕ ĕне, çирĕм икĕ сурăх пур, – тет ÿркенмен çын.
Чăннипех пĕчĕк кĕтÿ мар-и вара; Паллах, вĕсене пĕччен пăхса пĕтереймĕн. Ывăлĕн çемйипе пĕрле пурăнать те, ку ĕçре ăна Рамильпа унăн мăшăрĕ Рамие пулăшаççĕ, пĕтĕм ĕçе пĕрлехи вăйпа пурнăçлаççĕ.
Хамидулловсен хур-кăвакал та йышлă – çитмĕл пуç ытла. Чăх-чĕпне вара шутласа та пĕтереймĕн.
Çемьен вунă гектар çĕр пур. Çавăнпа выльăх апачĕ хатĕрлес тĕлĕшпе йывăрлăхсем çук темелле: нумай çул ÿсекен курăксем тулăх çитĕннĕрен утă та самаях янтăласа хунă.