07 сентября 2011 г.
УЙ-ХИР тыр-пултан пушанчĕ пулин те, ялта хĕрÿ ĕç вĕçленчĕ теме çук. Кĕр акине вăхăтра, лайăх пахалăхпа ирттермелле, çĕртме сухи туса хăвармалла.
– Кĕрхи тулă 300 гектартан кая мар акатпăр, – терĕ "Колос" Агрофирма" ООО ертÿçи Виталий Захаров. – Вăрлăх çителĕклĕ, минерал удобренийĕ те кирлĕ чухлĕ хыватпăр. Çунтармалли-сĕрмелли материалсем кÿрсе килнĕ.
Кĕр акинче Николай Тимофеевпа Петр Захаров механизаторсен агрегачĕсем ĕçлеççĕ. Çĕр хатĕрленĕ çĕрте Николай Захаровпа Сергей Кузьмин механизаторсем тăрăшуллă.
Хуçалăх ертÿçи Федор Никифоровпа Николай Юманов сеяльщиксене, вăрлăхпа тивĕçтерсе тăракан Валерий Федотова та ырласа асăнчĕ.
Пуянкассисем кăçал вăйлă тыр-пул пуçтарса кĕртнĕ. Урпа гектартан 40-шер, çурхи тулă 32-шер центнер тухнă. Халĕ çитес çулхи пысăк тухăçшăн тăрăшаççĕ. Çĕре пĕтĕм лаптăк çинче сухаласа хăварма тĕллев лартнă.