10 сентября 2011 г.
РАЙОНТИ педагогсенчен чылайăшĕ килти хуçалăхра йышлă выльăх-чĕрлĕх усрать. Предпринимательсене сĕт тата аш-какай сутса, ĕçчен çынсем учителĕн пысăках мар шалу укçине хушма тупăшпа пуянлатаççĕ. Акă Кивĕ Шăмăршăри Андрей Ларионов – вăл Васанти тĕп шкул директорĕнче тăрăшать – темиçе çул ĕнтĕ хăйĕн килĕнчи хуçалăхĕнче икшер ĕне тытать (пăрăвĕсене сутнă). Çу кунĕсенче вăл предпринимателе куллен 35-36 литр сĕт сутнă. Халĕ 20-22-шер литр ăсатать.
Кил картинче – 5 сурăх, путексем. Хурсемпе чăх-чĕп те йышлă.
Андрей Владимирович хăйĕн хуçалăхне малалла аталантарса пырать. Кăçал вăл йывăçран лупас, гараж, мунча тунă, тăррисене çутă хĕç-тимĕрпе витнĕ.
Ĕçчен педагог выльăх-чĕрлĕх шутне чакарма шутламасть. Выльăх çимине çулленех ытлă-çитлĕ хатĕрлет. Утă-улăм кăçал та çителĕклĕ.