24 сентября 2011 г.
РАЙОНТА "Ваттисене – чыс та хисеп" Ыр кăмăллăх уйăхлăхĕ малалла пырать. Шкулсенче класс сехечĕсемпе тĕл пулусем йĕркелеççĕ, вĕсене аслă ăру çыннисене чĕнеççĕ. Районта тимуровецсен юхăмĕ çĕнĕрен чĕрĕлнине те ырламалла кăна. Тимуровецсем ватă çынсене кил хушшинчи тата çуртри, пахчари ĕçсене пурнăçлама пулăшаççĕ.
Паянхи ватă çынсем пурте хăй вăхăтĕнче тăван колхозра, предприятисемпе организацисенче тата учрежденисенче ĕçленĕ, Тăван çĕр-шыва тĕреклетессишĕн тăрăшнă. Шел те, çав ĕç коллективĕнчен чылайăшĕ халĕ çук ĕнтĕ. Апла пулин те ветерансене манăçа хăварас марччĕ. Ял поселенийĕсенче ĕçлекенсен ватă çынсене уяв ячĕпе саламлама манмалла мар. Тепĕр чух пĕчĕк çеç открытка та хаклă парне пекех чуна ăшăтать. Вырăнти депутатсем те хăйсен округĕсенчи ватă çынсене саламлама тивĕç.
Манăн уйрăмах çамрăксене чĕнсе калас килет: ырă ĕç тума васкăр, аслă ăру çыннисене пулăшма тăрăшăр. Ырри яланах ырăпа таврăнать, ватă çынсен пехил сăмахĕ сире кулленхи ĕçĕрте пулăшса пырĕ.