28 сентября 2011 г.
КАРАПАЙ ШĂМĂРШĂРИ Çĕнтерÿ урамĕнчи Александрпа Вера Степановсем 5 çул ĕнтĕ икшер ĕне усраççĕ. Кунсăр пуçне ĕçчен çемьен кил картинче – вунă сурăх (путексемсĕр пуçне), çитĕннĕ виçĕ пуç сысна (икĕ ама сыснана çăвăрлаттарма ĕмĕтленеççĕ), икĕ пысăк вăкăр, йышлă чăх-чĕп.
Йышлă выльăх-чĕрлĕх валли, паллах, выльăх çими те нумай кирлĕ. Арендăна илнĕ пĕр гектар çĕр çинче Степановсем нумай çул ÿсекен курăк акса ÿстереççĕ, утă çителĕклĕ хатĕрлеççĕ. Пахчара тухăçлă çĕр улми тата чĕкĕнтĕр çитĕнтереççĕ.
Сĕт тата аш-какай сутни ĕçчен çемьене килти хуçалăха малалла аталантарма сисĕмлĕ пулăшу парать. Степановсем хăйсен йывăç çуртне тулашĕнчен силикат кирпĕчпе илемлетнĕ, кивĕ çивиттине улăштарса çутă тимĕр листисемпе витнĕ. Кунсăр пуçне кăçал çĕнĕ лупаспа вите те тунă.