Публикации » Салтак ячĕ – хисеплĕ ят

26 октября 2011 г.

ЧĂВАШ Республикин çар комиссариачĕн разнарядкипе килĕшÿллĕн, Патăрьелпе Шăмăршă районĕсенчен кăçалхи кĕрхи призывра пурĕ 120 çамрăка çар службине ямалла. Службăна кайма тивĕçлĕ йĕкĕтсенчен чылайăшĕ районти çар-медицина комиссийĕ витĕр тухрĕç те ĕнтĕ. Ыттисем çак кунсенчех комиссире пулаççĕ. Октябрĕн 24-мĕшĕнче призывра салтака каймаллисен сывлăхне республикăри çар-медицина комиссийĕнче тĕрĕсленĕ. Призывниксене повестка паратпăр, унта хăш кун призыв пунктне ăсатмаллине палăртатпăр. Призывниксен ушкăнĕсене Канаша леçмелли план-график туса хатĕрленĕ ĕнтĕ. Патăрьелпе Шăмăршă районĕсенчи çамрăксен пĕрремĕш ушкăнне ноябрĕн 8-мĕшĕнче, ытлари кун, призыв пунктне ăсататпăр. Малтан палăртнă тăрăх, призывниксен юлашки ушкăнне Канаша декабрĕн 23-мĕшĕнче леçмелле. Çамрăксене призыв мероприятийĕсене вăхăтра килме сĕнетпĕр. Тăван çĕр-шыва хÿтĕлесси – кашни арçыннăн хисеплĕ тивĕçĕ.