09 ноября 2011 г.
САВĂК кăмăлпа, çу хута тар тăкнă хыççăн тинех лăпкă чунпа пуçтарăнчĕç районти ял ĕçченĕсем иртнĕ кĕçнерни кун Шăмăрша - хăйсен професси уявне чыслăн паллă тума. Район администрацийĕн пысăк залĕ çĕр ĕçченĕсене, выльăх-чĕрлĕх пăхакансене, фермерсене ăшшăн кĕтсе илчĕ. Уява саламлă сăмах каласа район администрацийĕн пуçлăхĕ В.П. Фадеев уçрĕ. Валерий Петрович, ĕç паттăрĕсене пуç тайса тав тунă май, çапла каларĕ: "Эсир - çĕр-шыври чи хисеплĕ çынсем, халăха çăкăр çитерекенсем. Сирĕн ĕçĕре хак пама, сире мухтаса калама сăмах та çитес çук. Пурсăра та çирĕп сывлăх, телей, ĕçре тата пурнăçра ăнăçу сунатăп". 2011 çулхи ял хуçалăх çулĕн кăтартăвĕсемпе тата умра тăракан тĕллевсемпе район администрацийĕн пуçлăхĕн пĕрремĕш çумĕ В.Н. Никифоров паллаштарчĕ. Владимир Николаевич сăмахĕнчен çакă палăрчĕ: Шăмăршă районĕнчи ял ĕçченĕсем вăхăт таппинчен юлмасăр, пурнăç çине çĕнĕлле пăхса, йывăрлăхсем умĕнче пуçа усмасăр ÿсĕм хыççăн ÿсĕм тăваççĕ. Кăçал уй-хиртен 24422 тонна тырă пуçтарса кĕртнĕ. Кашни гектартан вăтам шутпа 24,5 центнер тырă, 163 центнер çĕр улми, 180 центнер сахăр чĕкĕнтĕрĕ туса илнĕ. Тĕш тырăсемпе пăрçа йышши культурăсен вăрлăхĕсене пур хуçалăх та кирлĕ чухлĕ хывса хăварнă, вĕсен 47 процентне кĕркуннех кондицие лартнă.Çанталăкăн йывăр условийĕсене пăхмасăр, 3150 гектар кĕр тыррисене акнă. Тикĕс шăтса тухнă калча чуна савăнтарса ешерет, хресчен çитес çул та пысăк тухăç илме ĕмĕтленет. Выльăх-чĕрлĕх пăхакансен ÿсĕмĕсем те савăнтараççĕ. Кăçалхи 10 уйăхра, пĕлтĕрхи çак тапхăрпа танлаштарсан, аш 11 процент, сĕт 2,9 процент нумайрах туса илнĕ. Кашни ĕнерен 3512 килограмм е пĕлтĕрхинчен 2,7 процент ытларах сĕт сунă. Килти хушма хуçалăхсен аталанăвĕ те курăмлă. Кăçал 365 çемье патшалăхран 61 миллион тенкĕ çăмăллăхлă кредит илнĕ. Умра тăракан тĕллевсем пысăк: 2012 çулта районĕпе 16,6 пин тонна тырă, 29,5 пин тонна çĕр улми, 2,5 пин тонна пахча çимĕç, 3,7 пин тонна аш, 17 пин тонна сĕт туса илмелле. Ял хуçалăхĕнче çĕнĕ технологисене пурнăçа кĕртмелле, çĕр ĕç культурине ÿстерсе пымалла, выльăх-чĕрлĕх фермисене реконструкцилемелле. Уявра ял ĕçченĕсене Чăваш Республикинчи халăха ĕçпе тивĕçтерекен патшалăх службин ертÿçи С.П. Димитриев, "Букет Чувашии" ООО генеральнăй директорĕ О.В. Мешков, кÿршĕллĕ Патăрьел районĕнчи депутатсен Пухăвĕн председателĕн çумĕ, "Красное Знамя" хуçалăх ертÿçи П.Н. Никифоров тата ыттисем чун-чĕререн саламларĕç, йывăр та пархатарлă ĕçре çитĕнÿсем сунчĕç. Ĕçре мала тухнисене Хисеп грамотипе тата хаваслă юрă-ташăпа чысларĕç, залра чăваш, тутар, вырăс, ирçе юрри-кĕвви чуна ачашласа янăрарĕ.