16 ноября 2011 г.
ÇЫН сывлăхĕ мĕнле шайра пулни хăй мĕнле пурăннинчен килет. Арçынсен 62 проценчĕ пирус туртать, хĕрарăмсен – 15 проценчĕ.
Тĕнчере миллион çын пирус тĕтĕмĕпе пĕрле тĕрлĕ наркăмăшлă япаласем çăтать. Ученăйсем каланă тăрăх, çак начар туртăм çулталăкра 4 миллион çынна вилĕм патне илсе çитерет, çав шутран Раççейре – 300 пин çынна. Пирус туртса сывлăха хавшатнипе вилесси виççĕмĕш вырăнта тăрать. Ахальтен мар пирĕн Республика Президенчĕ М. Игнатьев Патшалăх Канашне янă Çырура ку ыйтăва та тимлĕх уйăрнă. Пирус туртнипе ÿпкесем, чĕре, ар тата ытти органсем аптăраççĕ. Хĕрарăмсен матка ракĕ аталанать, ачи сусăр çуралма пултарать, е вĕсем çие юлманнипе аптăраççĕ. Хырăмлăх язви пирус тĕтĕмне нумай çăтнипе те пулать. Пирусçăсен шăлĕсемпе шăл тунисем, куçĕсем, çăварĕн ăш-чикки чирлеççĕ, тĕрлĕ сасса йышăнакан аппарачĕ те хавшать, юн тытăмĕ те начарланать. 50 çула çитиччен асăннă киревсĕр йăлана пăрахсан, унпа çыхăннă чирсене пула вилесси 2 хут чакать.
Пирус туртсан, çынсем хăйсене вăхăтлăха лăплантарнăн туяççĕ, 4 пине яхăн наркăмăшлă япала çăтаççĕ, сĕрĕм вĕсен çывăх çыннисене те чылай сиенлет. Пируспа ашкăнакансем çывăрайманнипе нушаланаççĕ е пĕрмай çывăрас килнине туяççĕ, вĕсен тимлĕхĕ чакать, чунĕ канăçсăрланать, апат анми пулать, мăнтăрланса кайма пултараççĕ. Çакнашкал лару-тăрура вĕсем çемйисенче харкашу пуçараççĕ, эрех ĕçекен ушкăнсене хаваспах хутшăнаççĕ.
Пирус туртма пăрахас текенсен врачпа канашламалла, никотина улăштарма пултаракан мелсемпе усă курмалла, кулленхи киревсĕр йăласене хирĕçлеме пултаракан туртăма вăйлатмалла.