12 ноября 2011 г.
РФ Пенси фончĕн республикăри уйрăмĕ çамрăксен пенси пĕлĕвĕн шайне ÿстермелли вĕрентÿ проектне ĕçе кĕртни пирки массăллă информаци хатĕрĕсем пĕлтерчĕç. Мĕн тĕллевпе?
И.Васильев.
РФ Пенси фончĕн районти управленийĕнчен пĕлтернĕ тăрăх, унăн тĕллевĕ – çамрăксене пенсин тĕп саккунĕсемпе тата пулас пенсин тивĕçлĕ виçине йĕркелессипе интереслентересси.
Паянхи шкул ачисем страховани свидетельствине илнĕ хыççăн обязательнăй пенси страховани тытăмне хутшăнакансем пулса тăраççĕ ( сăмах май районти 15600 çынна регистрациленĕ, çав шутра 5000 пенсионера). Вăл мĕнле йĕркеленнипе паллашни, пулас пенсие ÿстермелли мелсемпе пĕлсе усă курасси пурнăç çулĕ çине тухма хатĕрленекенсемшĕн уйрăмах пĕлтерĕшлĕ. РФ Пенси фончĕ çамрăксем валли ятарласа учебниксем хатĕрлесе кăларчĕ.
Асăннă пособире пенсипе тивĕçтермелли йĕркене çутатнă, ăна схемăсемпе тата ÿкерчĕксемпе пуянлатнă, страховани никĕсĕпе, пухăнса пыракан пая ÿстермелли тата унпа хуçаланмалли механизмсемпе паллаштарнă, пĕлĕве хакламалли теста та кĕртнĕ. Кĕнекене шкулсенче пĕлÿ илекенсем валли хатĕрленĕ.
Пенси пĕлÿлĕхĕн кунĕ - вĕренÿ проекчĕн пуçламĕшĕ. Унпа килĕшÿллĕн аслă классенчи ачасемпе факультативсем, лекцисем, уçă алăксен кунĕсем тата ытти те ирттермелле.
Паянхи шкулăн тĕп тĕллевĕсенчен пĕри - ачасене социализацилесси, пурнăçа хатĕрлесси. Çавăнпа та пенси саккунĕсен никĕсне обществознанин факультатив урокĕсенче кăна мар, класс сехечĕсенче те тишкермелле.