07 декабря 2011 г.
ÇĔНĔ, 2012 çул та çывхарса килет. Çак илемлĕ те чаплă уява пирĕн районта та пысăк хавхаланупа кĕтсе илме хатĕрленеççĕ.
Декабрĕн 1-мĕшĕнчен пуçласа çак уйăхăн 22-мĕшĕччен районта пăр кĕлеткесен фестивалĕ иртет. Конкурс номинацийĕсем çапла: пăрпа юртан скульптура тăвасси; пăрпа юртан композици тăвасси; пăртан е юртан тунă юмахри хула. Конкурс районти Культура Керменĕ умĕнчи лапамра иртет. Çĕнтерÿçĕсене парнесем кĕтеççĕ.
Декабрĕн 1-15-мĕшĕсенче вара "Çĕнĕ çул ячĕпе, тăван Шăмăрш ен" ятпа шкул картишĕсене уяв тĕлне илемлетес тĕлĕшпе конкурс иртет.
"Чăваш вăрманĕ" наци паркĕнче "Чăрăшсене упрар" ятпа районти акци пуçланчĕ. Пĕр-икĕ кун савăнассишĕн мĕншĕн чипер ÿсекен чăрăша касса тĕп тумалла-ха; Акцие хутшăнакансем уявра искуствăлла чăрăшпа усă курма сĕнеççĕ тата тархасласах ыйтаççĕ.