17 марта 2012 г.
Чăваш Енри аграрисене çунтармалли-сĕрмелли япаласене (ÇСЯ) 30 процент йÿнетнĕ хакпа тивĕçтерес ыйту татăлнă. Март-июнь уйăхĕсенче "ЛУКОЙЛ" нефть компанийĕ 6,46 пин тонна дизтопливо, "Сургутнефтегаз" АУО 200 тонна бензин параççĕ. Ял хуçалăх предприятийĕсен вĕсене Чулхула облаçĕнчи (Сергач, Кстово хулисенчен) "ЛУКОЙЛ-Волганефтепродукт" ООО нефть базинчен харпăр хăй транспорчĕпе кÿрсе килмелле. Дизтопливăн кашни литрĕшĕн 17,2 тенкĕ тÿлемелле.
Республикăри районсен ÇСЯ мĕн чухлĕ туянмаллине ЧР Ял хуçалăх министерствин коллегийĕн февраль уйăхĕн 24-мĕшĕнчи анлă ларăвĕн йышăнăвĕпе килĕшÿллĕн çирĕплетнĕ.
ÇСЯ сутăн илме 489 хуçалăхран 80-шĕ тивĕçлĕ документсем тăратнă. Вĕсене тĕплĕ тĕрĕсленĕ хыççăн ООО тÿлев счечĕсем ярса парать. Ăна илнисем çак кунсенчех ÇСЯ кÿрсе килме çула тухаççĕ.
Ку уйăхра Чăваш Ен валли 630 тонна дизтопливо уйăрнă.