17 марта 2012 г.
Пирĕн корреспондентăн ыйтăвĕсене Чăваш Республикин çут çанталăк ресурсĕсен тата экологи министрĕн çумĕ Анатолий Яковлев хуравлать.
– Иртнĕ çулхи июль уйăхĕнчен çынсене сутакан йывăç калăпăшне улăштарнă. Мĕнле çĕнĕлĕх кĕртнĕ?
– Чăваш Республикин "Граждансем харпăр хăй валли йывăç касмалли йĕрке çинчен" 48-мĕш саккунĕнче нормативсене çирĕплетнĕ. Пурăнмалли уйрăм çурт тума 100 кубла метртан ытла мар кастаратпăр. Çуррине яхăн – лăсăлли. Килти хуçалăха çĕнетме – 20 кубла метртан ытла мар. Лăсăлли - 50%.
Пурăнмалли уйрăм çурта юсама – 30 кубла метртан ытла мар. Çуррине яхăн – лăсăлли. Килти хуçалăха çĕнетме – 20 кубла метртан ытла мар. Лăсăлли - 50%. Пур енĕпе те кашни çемьене пĕр хутчен çеç паратпăр.
Вутă-шанкă валли çулталăкра – 15 кубла метр. Калăпăр, пĕрре тытăнса нормативра палăртнă чухлĕ кăлараймастăр. Кун пек чухне мĕн юлнине иккĕмĕшĕнче илсе тухма пултаратăр. Çак йĕрке вут-çулăм, ытти инкек асап кăтартнă çемьесене пăтăрмахлă лару-тăрăва лекнĕ хыççăн çулталăк хушшинче пырса тивмест.
– Анатолий Петрович, пушарта инкек курнă çемьесене çурт лартмашкăн стройматериал уйăратăр-и?
– Пÿртсĕр, килти хуçалăхсăр е сарай-витесĕр юлнисем ыйтса çырнине чи малтан – республикăн Министрсен Кабинечĕ çирĕплетнĕ йĕркепе – 5 кунран кая хăвармасăр пăхса тухатпăр.
– Кăçал республикипе мĕн чухлĕ кастаратăр?
– Харпăр хăй валли - 263 пин кубла метр. Çав шутра лăсăллине – 50 пин, хытă çулçăллине – 8 пин, çемçе çулçăллине – 205 пин. Кунта çунчăк 29 пин хушăнать. Кашни район-хулана миçе кубла метр уйăрнине министерство сайтĕнче тĕплĕн пĕлтернĕ. Харпăр хăй валли йывăç кăларас текенсен унта ыйту тăратмалла. 2007 çулччен çырупа район-хула администрацийĕсене тухнă. Çынсене вăрман мĕн пысăкăш лаптăк тивессине çак уйăхра кашни муниципалитет органне пĕлтертĕмĕр.
– Министерство республика ячĕпе юридици тытăмĕсемпе, усламçăсемпе аренда килĕшĕвĕ çирĕплетет...
– Çапла. Йывăç кăларма, сутма, вăрман лартса çитĕнтерме, ăна хатĕрлеме. Вунă çуллăха 21 килĕшÿ тунă. Вĕсене 40,3 пин гектар шанса панă. Арендаторсен çуллен 62,8 пин кубла метр тÿнтерме ирĕк пур. Ку – республикăра кăçал касмалли лаптăкăн 9,9%.
Вăрман лаптăкĕсене малашне те тара паратпăр. Илес текенсене аукционра палăртатпăр. Вĕсенчен пĕри апрель уйăхĕнче иртĕ. Çитессинче Улатăр, Тăвай вăрманлăхĕсенчи лаптăксене пăхса тухатпăр.
– Виçĕм çулхи пушар вăрмана юхăнтарчĕ. Йĕркене кĕртме укçа кирлĕ пулĕ.
– Паллах. Федераци хыснинчен 120 миллион тенкĕ куçарса пама ыйтатпăр. Кун пирки федерацин Вăрман хуçалăхĕн агенствипе ĕçлетпĕр. Улатăр, Шупашкар, Çĕмĕрле, Етĕрне вăрманлăхĕсенче йывăç лартма хатĕрлетпĕр. Вут-çулăм Улатăр вăрманĕнче – 2251, Атăл леш енче 6880 гектара пĕтернĕ. Ĕç калăпăшĕ пысăк. Çак лаптăксене çунчăкран тасатса хунав лартмалла. Хальхи вăхăтра вутпа сиенленнĕ йывăçсене касатпăр.