14 марта 2012 г.
Çитĕнекен ăрăва граждăнла-патриотла воспитани парас, Тăван çĕр-шыва юратма, унăн историне хисеплеме вĕрентес, çамрăксене чăрмавлă лару-тăруран тухма хăнăхтарас ĕçре çамрăк армеецсен вăййисем пысăк пĕлтерĕшлĕ.
Акă çак кунсенче Карапай Шăмăршăри вăтам шкулта 7-8 классенче вĕренекенсем – "Зарница", 9-11 классенче вĕренекенсем "Орленок" çар вăййисенче ăмăртрĕç. Командăсем стена хаçачĕсем (листоксем) кăларчĕç, марш-бросокра чупрĕç, ÿт-пÿ çирĕплĕхне тата юрă-ташă ăсталăхне кăтартрĕç, автоматсем сÿтрĕç, каялла пуçтарчĕç, Тăван çĕр-шывăн çар историйĕпе çыхăннă ыйтусем çине хуравларĕç.
Тĕрлĕ конкурссен кăтартăвĕсене пĕтĕмлетсен, "Зарница" вăйăра çиччĕмĕшсем – пĕрремĕш, саккăрмĕшсем – иккĕмĕш, пиллĕкмĕшсем виççĕмĕш вырăн йышăнни палăрчĕ. "Орленок" вăйăра вуннăмĕшсем – пĕрремĕш, вун пĕрмĕшсем – иккĕмĕш, тăххăрмĕшсем виççĕмĕш вырăна тухрĕç.