04 апреля 2012 г.
ТУНТИ КУН район администрацийĕнче иртнĕ канашлура тавралăха тирпей-илем кÿмелли тапхăр пуçланни тĕп вырăнта пулчĕ. Район администрацийĕн пуçлăхĕ В.П. Фадеев вырăнсенче тирпейлĕхшĕн тăрăшманнипе кăмăлсăр пулнине пытармарĕ.
Кил-çуртри, пахчари тасамарлăхпа çÿп-çапа кăвайт чĕртсе çунтарма юраманни çинчен хаçатра темиçе хут та çырнă пулин те, ялсенче çав-çавах тĕтĕм йăсăрланнине асăрхама пулать. Уйрăмах пластик савăт-сапана çунтарни çынсен сывлăхĕшĕн хăрушă. Пахчари кăвайтсем пушар тухас хăрушлăх та кăларса тăратаççĕ.
Çанталăк ăшăтсанах Шăмăршă урамĕсенче ушкăнĕ-ушкăнĕпе качака çÿрени те – çуллен тĕл пулакан япăх тĕслĕх. Çак выльăх сиен кÿнипех лартнă хунавсем чĕрĕлеймеççĕ, унччен аванах ÿснисем те хăраççĕ. Кăçал ун пек ан пултăр тесен ял поселенийĕнче ĕçлекенсен паян-ыранах качака усракан çынсемпе тĕл пулса калаçмалла тата асăрхаттармалла, Шăмăршăра качакасене кĕтÿре кĕтессине йĕркелемелле.
Юр кайсанах пур çĕрте те тавралăха тирпей-илем кĕртмелли субботниксем ирттермелле, вĕсене кашни çын хутшăнтăр тесе тăрăшмалла.
"Район центрĕнче, ялсенче тирпейлĕ пулни – пирĕн чыс, – палăртрĕ В.П. Фадеев. – Ку ĕçре аяккинчен пăхса тăракансем, япăххишĕн савăнса пурăнакансем пулмалла мар. Ял вăл – пирĕн кил, пирĕн пĕчĕк тăван çĕр-шывăмăр. Атьăр-ха хамăр районăн чăн-чăн патриочĕсем пулар, тирпей-илемшĕн ватти те, вĕтти те тăрăшар".