14 апреля 2012 г.
ÇУРХИ шыв-шур кĕтмен инкексем кăларса тăратассине хирĕç кĕрешес тĕллевпе районта ятарлă комисси туса хунă. Комисси членĕсем вырăнсене тухса çÿреççĕ, лару-тăрăва контроллесе тăраççĕ.
Юлашки вăхăтра Паснари шыв шайĕ хăвăрт çĕкленни палăрать. Çакă Асанкасси ялĕнче пурăнакансемшĕн хăрушлăх кăларса тăратма пултарать. Нумаях пулмасть комисси, район администрацийĕн пуçлăхĕ В.П. Фадеев ертсе пынипе, Асанкассинче хăйĕн черетлĕ ларăвне ирттернĕ. Унта район администрацийĕн пуçлăхĕн çумĕ В.Петьков шыв-шур вăхăтĕнчи лару-тăрупа, Пăчăрлă-Пашьел ял поселенийĕн пуçлăхĕ В.Угарин, Шăмăршăри пушар чаçĕн начальникĕ А.Фомин, кăнтăрти электричество сетьĕсен начальникĕ А.Денисов инкексене сирсе ярас тĕлĕшпе мĕнле ĕçленипе паллаштарнă.
Ларура район администрацийĕн пуçлăхĕ В.П. Фадеев шыв-шур вăхăтĕнче мĕнпур службăсен кулленех тимлĕ пулмаллине палăртнă.