16 мая 2012 г.
Тунти кун район администрацийĕнче çĕртме уйăхĕн 10-мĕшĕнче Раççей историйĕн çулталăкне тата Шăмăршă районне йĕркеленĕренпе 85 çул çитнине халалласа ирттерекен районти ĕçпе юрă тата спорт уявĕн – Акатуйăн йĕркелÿ комитечĕн ларăвĕ пулса иртнĕ. Унта комитет председателĕ – район администрацийĕн пуçлăхĕн пĕрремĕш çумĕ В.Н. Никифоров уява хатĕрленсе кĕтсе илмелли мероприятисемпе ĕçсен планĕпе паллаштарнă.
Йĕркелÿ комитечĕ пĕлтернĕ тăрăх, "Акатуй-2012" программи пуян та анлă. Уяв тăршшĕпех юрă-кĕвĕ янăрĕ, халăх ăстисен куравĕ ĕçлĕ, спорт ăмăртăвĕсем иртĕç, суту-илÿпе апатлану точкисем йышлă пулĕç.
Ĕçпе юрă тата спорт уявĕнче çурхи ака-суха ĕçĕсене пĕтĕмлетĕç, çĕнтерÿçĕсемпе ĕçре малта пыракансене чыслĕç.
Акатуй, йăлана кĕнĕ йĕркепе, Шăмăршă ялĕ çумĕнчи илемлĕ хыр вăрманĕнче пулать, лаша спортне юратакансене ипподром кĕтет.
Уяв 10 сехетре пуçланать.