26 мая 2012 г.
Шăнкăр-шăнкăр сас пачĕ шăнкăрав. Пĕрисемшĕн – хаваслăн, теприсемшĕн хурлăхлăн илтĕнчĕ вăл. Вун пĕрмĕш класс пĕтерсе шкулпа сыв пуллашакансем текех унăн сассипе урока васкамĕç, парттăсем хушшине вырнаçса ларса вĕрентекен килессе те кĕтмĕç. Хаваслă шкул çулĕсем вĕсемшĕн вĕçленчĕç, умра – экзаменсем. Вĕсене ăнăçлă тытса малалла хĕрсемпе каччăсем хăйсен пурнăç çулне суйласа илĕç.
Паллах, вĕренекенсем нихăçан та хăйсен юратнă вĕрентекенĕсене асран кăлармĕç. Вĕсенчен пĕрре мар пулăшу ыйтма тивĕ-ха вĕсен, куçа-куçăн тĕл пулса калаçмаллисем те нумай пулĕç. Вĕрентекенсем вара яланах пулăшса пырĕç, ăс парĕç.
Кăçал пирĕн районти шкулсенчен вун пĕр класс пĕтерсе 113 хĕрпе каччă тухать. Вĕсем – Шăмăршăран – 55, Пăчăрлă Пашьелĕнчен – 23, Палтиелĕнчен – 14, Карапай Шăмăршăран – 21. Тăххăрмĕш класпа сыв пуллашакансем вара – 169-ăн. Шăмăршăри – 50, Карапай Шăмăршăри – 21, Пăчăрлă Пашьелĕнчи – 27, Палтиелĕнчи – 15, Анат Чаткасри – 8, Пуянкассинчи – 6, Васанти – 13, Кивĕ Чукалти – 18, Патирекри 11 вĕренекен тулли мар вăтам пĕлÿ илни çинчен ĕнентерекен аттестатсем илме тивĕçĕç. Малтан вара вĕсен те пĕрлĕхлĕ патшалăх экзаменне тытма тивĕ.
Шкулпа сыв пуллашакан хĕр-упраçпа яш-кĕрĕм çĕр-шыва кирлĕ çынсем пуласси пирки иккĕленместпĕр. Вĕсем пире хăйсен çитĕнĕвĕсемпе татах та савăнтарасса шанатпăр. Пурне те телейлĕ çул сунатпăр.