20 июня 2012 г.
ĔÇЕ чунтан парăннă çынсем пурăнаççĕ Патирек ялĕнче. Ахаль алă усса ларакансене кураймăн кунта – пурте ĕçлĕ. Халĕ уйрăмах. Утă çи пуçланчĕ вĕт. Курăксене вăхăтра çулса пуçтарас пулать. Хĕл хырăмĕ аслă: выльăх-чĕрлĕхе хĕл каçарма утă-улăмĕ те самаях кирлĕ. Паянхи кун кашни килтех курăк çулаççĕ. Ку тĕлĕшпе фермерсен те хĕрÿ тапхăр. Вĕсем те курăксене пĕрремĕш хут çулассине вĕçлесе пыраççĕ. Ытлашши утта сутма май пур. Туянас текенсем питех хаклашса тăмаççĕ, пĕр тоннине 3,5-4 пин тенкĕ парса илме хатĕр. Ял çыннисене утă çулма ялта тракторсем тытакансем те пулăшаççĕ. Кăçал, акă, Сергей Захаров Т-25 трактор туянчĕ. Косилки те хăйĕн. Вăл пурне те пулăшма хатĕр. Фермерсем пирки те çакнах каламалла. Фермерсем тенĕрен, вĕсем техника хатĕрĕсене çĕнетсех пыма тăрăшаççĕ. Кăçал кăна Игорь Федотов рулонлă пресс-подборщик, Ресим Алексеев МТЗ трактор туянчĕç, Радик Хамдеев çĕнĕ косилкăллă пулчĕ.