27 июня 2012 г.
ИЮНĔН 24-мĕшĕнче Шупашкарта Чăваш Республикипе федерацин НППП, чикĕ леш енче пурăнакан ентешсен тата пĕтĕм тĕнчери гуманитари ĕçтешлĕхĕн ĕçĕсен агенстви (Россотрудничество) пĕр-пĕринпе çыхăнса ĕçлесси пирки калакан килĕшĕве çирĕплетнĕ. Ку документа Чăваш Ен Пуçлăхĕ Михаил Игнатьев тата Россотрудничество ертÿçи Константин Косачев алă пуснă. "Ку документ ĕçтешлĕхĕн пире кăсăклантаракан çул-йĕрĕсене пĕрлештерчĕ. Паллах, экономика енĕпе пĕр-пĕринпе çыхăнса ĕçлесси, хуçалăх тытса пыракан субъектсене Чăваш Ен тулашĕнче ăнăçлă та тухăçлă вăй хума май туса парасси пĕлтерĕшлĕ", – ăнлантарнă Килĕшÿ тĕллевне Михаил Игнатьев. "Малашне Чăваш Енĕн кирек мĕнле делегацийĕн те, чикĕ леш енне каяканскерĕн, пирĕн представительствăсене хăйĕн тăван килне, Чăваш Республикин представительствине кĕнĕ пекех, кĕме тата кирлĕ чухне яланах пулăшу илме май пулĕ", - тенĕ Константин Косачев.