30 июня 2012 г.
РАЙОНТИ ачасене хушма пĕлÿ паракан "Туслăх" ачасемпе çамрăксен спорт шкулĕнче спортăн тĕрлĕ енне аталантарма тăрăшаççĕ. Кунта темиçе секци ĕçлет, вĕсенче вĕренекенсемпе çамрăксем хăйсен ÿт-пÿне пиçĕхтереççĕ, сывлăхне çирĕплетеççĕ. Çавăн пекех ăмăртусенче те вĕсем çитĕнÿсемпе савăнтараççĕ.
Юлашки çулсенче триатлон енĕпе те палăра пуçларĕç пирĕн ентешсем. Вĕсене Чăваш Республикин пĕрлештернĕ командине те кĕртеççĕ. Шупашкарта иртнĕ триатлон енĕпе пулнă Раççей шайĕнчи ăмăртăва Чăваш Еншĕн Дмитрий Ефимовпа Илья Хлюкин тупăшнă. Илья ăмăртăвне Чăваш Республикин командин тренерĕ пысăка хурса хакланă, шанчăк параканскер тесе палăртнă. Дима вара эстафетăра палăрнă. Вăл пиллĕкмĕш тапхăрта Чăваш Ен командине 9 вырăнтан 6 вырăна сĕтĕрсе кăларма пултарнă.