03 августа 2012 г.
2004 çулхи октябрĕн 8-мĕшĕнче Пăчăрлă Пашьелĕнче çак ялта çуралса ÿснĕ В. Ермолаев предприниматель тата вăл йĕркеленĕ Шупашкарти "Березка" суту-илÿпе промышленность компанийĕ çăмăл атлетсен кроссне ирттернĕччĕ. Унта Сиднейри çуллахи 27-мĕш Олимп вăййисенче хăвăрт утса бронза медале тивĕçнĕ В. Андреев та хутшăнчĕ, çĕнтерÿçе хăй ятĕнчен ятарлă хаклă приз пачĕ.
В. Андреев Елчĕк районĕнчи Яманчурел ялĕнче çуралса ÿснĕ. Шăпах маларах асăннă ăмăртура тĕл пулса паллашма тиврĕ паллă спортсменпа. Эпĕ Елчĕк кĕрÿшĕ пулнине пĕлсен, вăл хăй савăннине пытармарĕ. Унпа хăвăрт пĕр чĕлхе тупрăмăр. Владимир калаçма юратакан, сăмахшăн кивçене кайман çын пулни тÿрех лайăх сисĕнчĕ.
Ăмăрту вĕçленсен олимпиеца редакцие чĕнтĕм. Редакци ĕçченĕсемпе унпа тĕл пулу ирттерес шухăш Пăчăрлă Пашьелĕнчех çуралнăччĕ-ха. Хирĕçлемерĕ Владимир, хаваслах килĕшрĕ.
Интереслĕ, асра юлмалла иртрĕ тĕл пулу. Олимп вăййисен бронза призерĕ ун чух нумай-нумай ыйту çине хуравларĕ,республикăри спорт пурнăçĕпе паллаштарчĕ, паллă спротсменсем çинчен каласа пачĕ.
В. Анреев умĕн те, ун хыççăн та республикăри паллă спортсменсем, уйрăмах олимпиец, редакцире урăх пулман.