03 октября 2012 г.
Вĕрентекенĕн ĕçĕ çăмăл мар. Вăл пĕтĕм вăйне ачасене ăс панă çĕре ярать. Унăн ăшши, юратăвĕ кашни вĕренекенех çитет. Пурне те пĕр пек пĕлÿ пама тăрăшать.
Шăмăршăри пĕтĕмĕшле пĕлÿ паракан вăтам шкулти пуçламăш классен вĕрентекенĕ Ирина Хафизова хăйĕн профессине чун-чĕререн юратать. Вĕрентекенсен çемйинче çуралнăскер, учителĕн ĕçĕ çăмăл пулманнине яланах туйнă. Апла пулсан та вĕрентекен пулса тăнă. Вăл 17 çул ĕнтĕ ачасене вулама, çырма, задачăсем шутлама вĕрентет. Ăш пиллĕхлĕ, ырă кăмăллă Ирина Харитоновна вĕрентекенсемпе те, вĕсен ашшĕ-амăшĕпе те яланах пĕр чĕлхе тупать. Уроксене те вăл интереслĕ, çĕнĕлĕхсем кĕртсе ирттерет. Вĕренекене тарăн пĕлÿ парасси – унăн пĕрремĕш тивĕçĕ.
И.Хафизова сывă пурнăç йĕркине те çирĕп пăхăнать. Телейлĕ ача амăшĕ хăйĕн вĕренекенĕсене спорта юратма, сывлăхлă çитĕнме вĕрентет. Хăй те ăмăртусене хастар хутшăнать.