03 октября 2012 г.
РОСГИДРОМЕТЦЕНТР пуçлăхĕ Александр Фролов пĕлтернĕ тăрăх 2012-2013-мĕш хĕлле Раççейре сивĕ пулмалла. Тата мĕн кĕтет-ха пире?
Хĕлле çанталăк вĕçĕмсĕр улшăнса тăрĕ: йĕпе юр çуса хура пĕлĕтсем сирĕлнĕ хыççăнах шартлама сивĕ çитĕ, тÿпе янкăрланĕ.
Çанталăк майĕпен сивĕтсе пырĕ. Февральте вара шартлама сивĕ пуласса шантараççĕ синоптиксем. Çакă климат улшăнса пынипе те çыхăннă: январьтипе танлаштарсан хĕл вĕçĕнче сивĕрех. Ноябрьте вара пач урăхла. Унччен Раççей варринче ноябрьтех хĕл ларнă пулсан юлашки вунă çулта вара пире ăшша хăнăхтарчĕ.
Октябрь. Атăлçи, Урал, Коми тата Çĕпĕрĕн кăнтăр тăрăхĕсенче кĕркунне çурричченех ăшăпа савăнтарĕ. Çак регионсенче сывлăш температури нормăран та пысăкрах пулмалла. Ыттисенче – кĕркуннехи яланхи çанталăк.
Ноябрь. Уралта, Хабаровск крайĕпе Амур облаçĕнче самай ăшăрах. Ытти регионсенче çанталăк яланхи пекех, анчах çиллĕ тата час-часах çумăрпа юр çăвĕ. Раççейĕн кăнтăр енче тата Çурçĕр Кавказра ноябрь иртнĕ çулхинчен ăшăрах тăрĕ.
Декабрь. Красноярск крайĕпе Якутире тата Инçет Хĕвел тухăçĕнче хĕл пуçламăшĕ ăшă килĕ. Раççейĕн ытти пайĕнче вара декабрь 2011 çулхинчен сивĕрех пулмалла.
Январь. 2013 çулăн пĕрремĕш уйăхĕнче пĕлтĕрхинчен сивĕрех пулĕ. Çапах, пĕтĕмĕшле илсен, ытти чухнехинчен пит уйрăлсах тăмалла мар.
Февраль. Хабаровск, Якути, Магадан тăрăхĕсенче ăшă çанталăк кĕтмелле. Европа пайĕнче тата Уралта сывлăш температури климат норминчен пĕчĕкрех. Çапах 2012 çулхи февральти пек шартлама сивĕ пулмасса шантараççĕ синоптиксем. Çуркунне ир тата хăвăрт килĕ, уйрăмах çĕр-шывăн тĕп пайĕнче. Чăн та, вăрах вăхăтлăх тунă прогнозăн 70 проценчĕ кăна тÿрре килет.