03 ноября 2012 г.
ПĔРРЕХИНЧЕ Ваççапа Марье ĕçке кайма пуçтарăннă, тет. Шукăль тум-тир тăхăннă май Марье Ваççана калать, тет:
– Эсĕ, Ваççа, хăнана çитнĕ-çитменех эрех-сăрана ан ĕç. Ÿсĕрĕлетĕн. Ĕçкĕн-çикĕн чăн вăхăчĕ каярах вăл, çынсем юрлани-ташланине курса киленме тăрăш.
Çитрĕç, тет, хăнана. Хĕрарăмсем пĕр кĕтессе вырнаçнă, арçыннисем кайри пÿртре кĕпĕрленнĕ. Сĕтел хушшине ларайман-ха. Кил хуçи четвĕрте аншарли янă та арçынсене сăйласшăн, кил хуçи хĕрарăмĕ хĕрарăмсене сăра стаканĕ сĕнсе çÿрет. Арçынсем кашниех пĕрер черкке ÿпĕнтереççĕ. Кил хуçи Ваççа патне çитрĕ.
– Çук-ха, эпĕ ĕçместĕп, – тет Ваççа.
Эрех черкки малалла çÿрет.
Темиçе хутчен те çапла пулчĕ, тет. Кашнинчех Ваççа:
– Çук-ха, эп ĕçместĕп, – терĕ, тет.
Сĕтел хушшине те ларчĕç, апат-çимĕçе тутанчĕç, ĕçрĕç те çирĕç. Пурне те эрех-сăрапа сăйлаççĕ. Кил хуçи Ваççа умне çитет те, "Эсĕ пурпĕрех ĕçместĕн-ха", – тет те, унпа юнашар ларакан хăнана эрех черкки тыттарать. Ĕçĕччĕ Ваççа, анчах та сĕнмеççĕ, ыйтсах ĕçме аван мар. Акă, юрă-ташă та пуçланчĕ, ĕçкĕ хĕрнĕçемĕн хĕрсе пычĕ - Ваççа тăп-тăрах сĕтел кĕтессинче ларчĕ. Ăна никам та асăрхамарĕ.
"Э-э-э, – терĕ Ваççа хăйĕн ăшĕнче. – Кун пек ларса пулмасть, киле утсан авантарах".
Марье самаях хĕрнĕ, ташă ушкăнĕнче тăпăр-тăпăр туса, такмак каласа ташлать.
– Киле пуçтарăнма вăхăт, – тет ăна мăшăрĕ.
Тухса утрĕç, тет, вара иккĕшĕ киле. Ваççа малта тăп-тăрă утса пырать, тет, хыçалта Марье йăпăртатса чупать, тет. Хăй тĕллĕн калаçать, тет, хĕрарăмĕ:
– Эх, кăна пĕлнĕ пулсан, "Ваççа, ĕç, Ваççа, ĕç", – теттĕмччĕ...
Çапла пулнă хыççăн Ваççа хăнана çитсен пĕрремĕш черккине çÿле-çÿле çĕклет те пур çынсем те курмалла тĕппипех ĕçсе парать, тет.