10 ноября 2012 г.
ПОЛИЦЕЙСКИЙ-водительсен ĕçĕ пысăк яваплăхпа çыхăннă. Преступлени тунă вырăна "вĕри йĕр" тăрăх кайса çийĕнчех уçса памалла чухне е автомашинăллă преступника хăваланă вăхăтра вĕсен ĕçĕ уйрăмах пĕлтерĕшлĕ.
Çак ÿкерчĕкре эсир (сулахайран сылтăмалла) Марс Тимирбулатов, Юрий Карпов тата Александр Борисов полицейский-водительсене куратăр. Вĕсем ĕçре тăрăшулăхпа палăрса тăраççĕ, хăйсене шанса панă "УАЗ" маркăллă автомашинăсене яланах юсавлă тытаççĕ. Оперативлă шырав ушкăнне лартса вĕсем хăйсен автомашинисемпе талăкăн хуть-хăш сехетĕнче те, кирек мĕнле çанталăкра та çула тухма хатĕр. Водитель пулнисĕр пуçне службăра ытти хăш-пĕр ĕçсене те тăваççĕ.
Служба тивĕçне çулран-çул тÿрĕ кăмăлпа пурнăçласа пынă май, Марс Тимирбулатов аслă сержанта, Юрий Карпов старшинана тата Александр Борисов аслă сержанта полици уйрăмĕн начальникĕ нумай хутчен тав тунă, укçа премийĕсем парса чысланă.