Публикации » Эй, тăван чĕлхемĕр!

Эсĕ чăваш юманĕ пек ватă та патвар; хăвăн хăватна çухатмасăр, ĕмĕртен-ĕмĕр, çултан-çул тĕрекленсе ÿсетĕн, юман вутти пекех хĕрÿллĕ те вăйлă çунатăн; чĕре кÿтсе килсен – ăшăтатăн; кирлĕ чухне – çунтаратăн; тăваншăн эсĕ – тĕттĕмри çул маякĕ, тăшманшăн – вилĕм тытамакĕ. Эсĕ чăваш тĕрри пек паха та илемлĕ, асамлă та ытарлă. Эсĕ чăваш юрри пек кĕвĕллĕ те янăравлă; санра чуна ачашлама е амантма, çĕклеме е ÿкерме, хавхалантарма, çунатлантарма хăват пур; вăрман пек пуян, хир пек уçăмлă эсĕ. Сан иксĕлми хăватупа таса илемÿ çултан-çул палăрсах пыринччĕç.

Эй, аслă асаттемĕрсен кивелми чаплă чĕлхи! Ирĕклĕ çĕр-шывра ĕмĕр ирĕклĕн янăра эсĕ! Тайма пуçăм сана!

А.АРТЕМЬЕВ.