ÇАК ятпа иртрĕ ачасемпе учительсен тата ĕç ветеранĕсен тĕлпулăвĕ Виçпÿрт Шăмăршă шкулĕнче. А. Юманова учительница хăнасемпе паллаштарчĕ.
– Вăрçă пуçланнă чухне эпĕ 6 çулхи ача пулнă. Вăрçă мĕнне ăнланман. Анчах атте вăрçа кайнине ас тăватăп: пÿрт тулли çын, анне, хĕрарăмсем йĕреççĕ, вĕсемпе пĕрле эпĕ те йĕретĕп,– пуçларĕ сăмахне халăха вĕрентес ĕç отличникĕ, Нина Федоровна Александрова.
«Эпĕ аттене ас тумастăп, вăл вăрçă пуçлансан 4 кунтанах , 1941 çулхи июнĕн 26-мĕшĕнче, фронта тухса кайнă, разведчиксен взвочĕн командирĕ пулнă. Атте ачашланине, ăс вĕрентнине курма пÿр-мен пулсан та атте пилĕпе пурнăç çулĕ тăрăх тÿрĕ чунпа утрăм»,– çапла каласа пачĕ Валерьян Владимирович Егоров.
«Вăрçă чарăннă куна питĕ лайăх астăватăп. Майăн 9-мĕшĕнче пĕтĕм шкул, ял çыннисем урама тухнăччĕ, кашнийĕн пит-куçĕ савăнăçпа тулнăччĕ. Вăрçă хыççăн пурнăç çулран-çул лайăхланма пуçларĕ»,– çапла аса илчĕ хăйĕн ачалăхне ялти хисеплĕ колхозник, 5 ывăл ашшĕ, 7 мăнук аслашшĕ Павел Андреевич Падиаров.
А. ЮМАНОВА,
Виçпÿрт Шăмăршăри тулли мар вăтам шкулĕн учительници.
(«Шăмăршă хыпарĕ» 2000 çул,
апрель, 22)