Публикации » Сахăр виçине чакарма

– Диабетăн пуçламăш тапхăрĕнче 5 пай хура тул кĕрпине аçтăрхан мăйăрĕн 1 пай вĕтетнĕ тĕшшипе хутăштармалла. Каçхине 1 апат кашăкĕ хутăша стакана ямалла, чĕрĕк стакан турăх хушмалла. Пăтратмалла мар. Ирхине пирченĕ пăтта выçă хырăмла пан улмипе пĕрле çимелле. Унтан кун тăршшĕпе тата 2 хут апатчен 30 минут маларах кĕрпепе мăйăр хутăшне типĕлле 1-ер апат кашăкĕ çимелле. Сиплев курсĕ – 30 кун.

– 500 грамм сельдерей тымарĕпе 6 лимон кирлĕ. Лимонсене хуппине щеткăпа хырсах лайăх çумалла. Сельдерей тымарне тасатмалла, 300-350 грамм юлать. Ăна лимонсемпе пĕрле аш арманĕпе авăртмалла, эмальленĕ кастрюле хумалла, хупăлчапа витсе вăйсăр çулăм çинчи шыв мунчине 2 сехете лартмалла. Хупăлчине уçмалла мар! Унтан çак варение кĕленче савăта куçарса сивĕтмĕше лартмалла. Ирсерен выç хырăмла, апатчен 30 минут маларах, 1-ер апат кашăкĕ çимелле. Икĕ уйăха çитет.