Публикации » Çивĕч ыйтусем тавра

ТУНТИ КУН район администрацийĕн пуçлăхĕ В.Фадеев ирттернĕ канашлура чи çивĕч ыйтусенчен пĕри Шăмăршăпа ытти ялсен урамĕсене çÿп-çапран тата хыт-хураран тасатасси пулчĕ. Районăн унчченхи ырă ятне каялла тавăрассишĕн çанăсене тавăрса, тар юхтарса ĕçлемелле. Кашни ĕç коллективĕ хăйĕн организаци, учреждени йĕри-таврашĕнче тирпейлесе пуçтарса тăма тÿрремĕнех яваплă. Техника паркĕсемпе фермăсен территорийĕсене те ашкăрса ÿсекен вĕлтĕ-ренпе пиçенрен тасатмалла, çул хĕррисене çулса тăкмалла. Ял çыннисемпе ăнлантару ĕçне ирттермелле: çурт умĕнче вĕлтĕренпе эрĕм кашласа ÿсни, çÿп-çап йăваланса выртни тăван ял ятне ярать вĕт-ха. «Эпир Шăмăршă районĕнче пурăнатпăр, апла пулсан район чысĕшĕн пурин те пĕр çын пек пулса, чăн-чăн патриот пулса тăрăшмалла», – терĕ В.Фадеев.

Район администрацийĕн вĕрентÿ тата çамрăксен политики пайĕн ертÿçи Н.Игнатьева районти виçĕ шкулта юсав ĕçĕсем еплерех пурнăçланни çинчен каласа пачĕ.

Шăмăршă больницин тĕп врачĕ И.Смирнова инфекци отделенийĕнче, бак-лабораторипе апат-çимĕç хатĕрлекен блокра юсав ĕçĕсем вĕçленнине пĕлтерчĕ.

Калаçу тыр-пул пуçтарса кĕртессипе, выльăх апачĕ хатĕрлессипе, вут-кăвартан сыхă тăрассипе, шыва кĕнĕ чухне асăрхануллă пулассипе çыхăннă ыйтусем тавра та пычĕ. Район администрацийĕн пуçлăхĕ ертÿçĕсен яваплăха çирĕп туймаллине палăртрĕ.

Т.ФЕДОТОВА.