Чăваш халăх поэчĕ Николай Шелепи хăй вăхăтĕнче Çĕрпÿ пасарĕ çинчен ятарласа пысăк поэма çырнă, пасарта темĕн те пĕр пуррине асăннă. Шăмăршă пасарĕ мĕнрен кая вара; Вăл та чухăн мар – укçу çеç пултăр. Пасара кĕнĕ çĕрте – улма-çырла сутакансем. Пĕри чие сутать. Пилĕк литрлă витре – 250 тенкĕ. Никамăн та мĕн пуррине сая ярас килмест вĕт: сутайсан – кăштах та пулин тупăш.
Хăмла çырли те пур. 3 литрлă савăт – 200 тенкĕ. Пĕр хĕрарăм витре хура хурлăханшăн 400 тенкĕ ыйтатчĕ. Сутлăхра черешня та пур. Тутанса курас тесен – пĕр килограмĕшĕн 150 тенкĕ.
Пахча çимĕçе илес пулсан, помидорăн пĕр килограмĕ, сорчĕсене кура, 25-40 тенкĕ таран. Килте хăяр ÿс- термен-и; Вăл пасарта пур: килограмĕ пурĕ те 15 тенкĕ çеç. Тутлă пăрăç – 30-40 тенкĕ. Баклажан кирлĕ-и – тархасшăн, 30 тенкĕ.
Пирĕн тăрăхра арбуз-дыня ÿсмеççĕ те, вĕсене пасартах туянма май пур. Арбузĕ – 12 тенкĕ, дыня – 30.
Хальхинче сухан курăнмарĕ. Ыхра вара пур. Камшăн хаклă-тăр е йÿнĕ – килограмĕ 150 тенкĕ.
Сĕт продукчĕсен хакĕсем хальлĕхе ÿсмен-ха. Сĕтĕн 1,5 литрлă савăчĕ çавăн пекех, 30 тенкĕ. Тăпăрчă – 100, услам çу – 200-шер тенкĕ. Çав вăхăтрах çăмарта хакĕ пысăкланчĕ, халĕ унăн пĕр теçеткишĕн 50 тенкĕ ыйтаççĕ.
Аш-какай сутакансем, яланхи пекех, хальхинче те йышлă. Туянакансене çакă савăнтарать: кăштах та пулин, сысна ашĕн хакĕ чакнă: тачкăлăхне кура пĕр килограмне халĕ 130 тенкĕрен пуçласа туянма пулать, сало – 100 тенкĕ. Ĕне ашĕ çукчĕ пулин те, унăн килограмĕ 180 тенкĕрен кая мар терĕç. Ливер – 30 тенкĕ, чăх тукмакĕ – 100, рагу – 70.
Сахăр песукĕн хакĕ халь- лĕхе улшăнман-ха: пĕр миххи – 1500 тенкĕ. Халĕ варени-компот хатĕрлемелли тапхăр та, хăшĕсем ăна икшер михĕ таранах туянаççĕ.
Чи пысăк сортлă тулă çăнăхĕн пĕр миххи – 950 тенкĕ, пĕрремĕш сортли унран 50 тенкĕ йÿнĕрех. Отрубин 25 килограмĕ – 200 тенкĕ. Комбикорм кирлĕ пулсан, 35 килограмшăн 500 тенкĕ кăларса хур. 3 литрлă банка пыл – 1500 тенкĕ.
Сутлăхра кăвакалсем те пур: пĕри – 250 тенкĕ. Кĕркунне хур тукмакĕ çиес тесен 350 тенкĕ ан шелле. Хальхинче, нихăçан пулманнине, кăрккасем те хăйсене 650 тенкĕлле суйласа илессе кĕтетчĕç. Пĕр чăх – 150 тенкĕ.
Банкăсем кирлĕ пулсан та пасара çеç çул тытмалла. Хакĕсем: çур литрли – 10, литрли – 15, литр çурăлли – 20, икĕ литрли – 23, виçĕ литрли – 25 тенкĕ.
В.НИКОЛАЕВ.