1962 çулхи августăн 11-мĕшĕнче пирĕн мухтавлă ентешĕмĕр, Сĕнтĕрвăрри районĕнчи Шуршăл ялĕнче çуралса ÿснĕ А.Г.Николаев «Восток-3» космос карапĕпе тĕнче уçлăхне çĕкленнĕ.
Андриян Григорьевич тĕнчере пĕрремĕш хут йывăрăшсăрлăха хăй çинче чăтса ирттернĕ, космонавтика историйĕнче çĕнĕ страница уçса уçлăхра 3 талăк та 22 сехет пулнă. Пĕр талăкран, августăн 12-мĕшĕнче, Украинăн мухтавлă ывăлĕ П.Р.Попович старт илнĕ. Икĕ космос карапĕ çĕр чăмăрĕ тавра ушкăнпа вĕçнĕ. Космос карапĕпе çыхăнса телепередача йĕркелесси те тĕнчере пĕрремĕш хут пулса иртнĕ.
Чаплă ентешĕмĕрĕн вĕçевĕн çĕр-шыври тата тĕнчери пĕлтерĕшне шута илсе, Шупашкар хула совечĕн ĕçтăвкомĕн 1962 çулхи августăн 13-мĕшĕнчи йышăнăвĕпе килĕшÿллĕн, Шупашкарти çĕнĕ ача садне А.Г.Николаев летчик-космонавт ятне пама йышăннă. Унчченхи Энтузиастсен урамне Шуршăл каччин ятне панă.
Çак çулах, августăн 29-мĕшĕнче, КПСС чăваш обкомĕн тата Чăваш АССР Аслă Канашĕн Президиумĕпе Министрсен Совечĕн постановленийĕпе килĕшÿллĕн, Совет Союзĕн Геройĕн Андриян Григорьевич Николаев летчик-космонавт ятне республикăри Ĕç мухтавĕн Хисеп кĕнекине кĕртнĕ.
1970 çулхи июнĕн 1-19-мĕшĕсенче А.Г.Николаев каллех тĕнче уçлăхĕнче вĕçнĕ. Ун чухне Андриян Григорьевич «Союз-9» космос карапĕн командирĕ пулнă. Вĕçев хыççăн ăна иккĕмĕш хут Совет союзĕн Геройĕн ятне тата авиаци генерал-майорĕн званине панă.
А.Г.Николаев хăйĕн уçлăхри паттăрлăхĕпе чăвашсен сумлă ятне тĕнче шайне çĕкленĕ. Унпа эпир тивĕçлипе мухтанатпăр. Андриян Григорьевич пирки статьясем, кĕнекесем çыраççĕ. А.Г.Николаев летчик-космонавта халалласа пирĕн республикăра тĕрлĕ мероприятисем иртеççĕ. Шел, мухтавлă ентешĕмĕр пиртен вăхăтсăр уйрăлса кайрĕ. Унăн çутă сăнарĕ, тĕнче уçлăхĕнчи паттăрлăхĕ ĕмĕр-ĕмĕр пирĕн халăхпа пĕрле пулĕ.
М.БЕЛКОВА,
«Чăваш Республикин хальхи историйĕн патшалăх архивĕ» бюджет учрежденийĕн специалисчĕ.