Публикации » Гектар хыççăн гектар

ПУР ĕç те хăйне вăхăтра пурнăçланине юратать. Унсăрăн мĕнле-ха: юлнă ĕç çине юр та çума пултарать-çке. «Исток» сахал яваплă обществăра вара пурне те маларах шута илеççĕ.

Кĕр тыррисене вăхăтра акса хăваратăн – çитес çул тухăçлă пулатăн теççĕ. Ку – ĕмĕрхи тĕрĕслĕх. Хуçалăхра халĕ хĕрсех кĕр аки пырать. Евгений Хураськин механизатор МТЗ-1221 кустăрмаллă тракторпа кĕрхи тулă акать.

– Вăрлăхпа çеç вăхăтра тивĕçтерсе тăччĕр – ĕç вăраха каймĕ, – тет çĕр гектара яхăн акма ĕлкĕрнĕ акаçă.

Ку тĕлĕшпе вара чăрмав çук: Ташир Арабов йăлтах ĕлкĕртсе тăрать. Геннадий Ефимов, Герман Поляков, Петр Якушов, Валерий Миронов, Юрий Куприянов сеяльщиксем те ĕçре вăр-вар, тăрăшуллă – акара пĕр çул кăна мар вĕт.

«Истокра» кашни гектарах минераллă удобренисемпе акса хăварма тăрăшаççĕ: «выçă» çĕр кĕтнĕ чухлĕ тухăç парайманни куç кĕретех. Мала пăхсан – малашлăх теççĕ.

Кĕр аки валли çĕр хатĕрлекенсене те палăртса хăвармалла. Вĕсем – Михаил Артыпов тата Алмрза Ташанов. Механизаторсем çĕре йывăр культиваторсемпе кăпкалатнă. Хуçалăхра çĕртме сухи те тăваççĕ. Уткир Исраилов хăйĕн «хурçă утне» самантлăха та канма памасть.

Н.МИРОНОВ.