Сентябрĕн 26-29-мĕшĕсенче Чăваш Ен Пуçлăхĕ Михаил Игнатьев Пĕтĕм тĕнчери XII «Сочи-2013» инвестици форумĕн мероприятийĕсене хутшăннă. Сентябрĕн 27-мĕшĕнче республика Пуçлăхĕ «Экономика аталанăвĕ тата пурнăç пахалăхĕ: вăхăт ыйтни, малашлăх» форумĕн пленарлă ларăвне хутшăннă. Унта тĕп доклада Раççей Правительствин Председателĕ Дмитрий Медведев тунă.
Паллă ĕнтĕ: 2008 çулхи финанс кризисĕ кăларса тăратнă йывăрлăхсенчен пĕтĕмпех хăтăлма май килмен, çитменнине тата кризиса хирĕç мерăсене чылай чухне тĕплĕн шухăшламасăр йышăннă.
Бизнес-климата лайăхлатма çĕр-шывра нумай вăхăтлăха кредит памалли рынока аталантарма хатĕрленеççĕ, уйрăммăн илсен, Федераци гаранти фондне туса хураççĕ. Инфратытăм проекчĕсене пурнăçа кĕртме Наци пуянлăхĕн фончĕн укçи-тенкипе анлăрах усă курмалла, патшалăхпа уйрăм çын çыхăнăвне аталантарма тивĕçлĕ норматив никĕсне йышăнмалла. «Инвестора Раççейре меллĕ, хăтлă тата сиенсĕр пулмалла», – тенĕ Дмитрий Медведев.
Пĕтĕм тĕнчери XII форум вăхăтĕнче Михаил Игнатьев Раççей Перекет банкĕн «ĕçлĕ апатланăвĕнче» пулнă. Унта регионсен экономикăпа тата социаллă пурнăçпа çыхăннă инвестици мегапроекчĕсене, уйрăммăн илсен – пысăк хăвăртлăхпа çÿремелли Мускав-Хусан чукун çул магистральне тăвассине – пурнăçламалли уйрăмлăхсене пăхса тухнă.
Ыйтусене сÿтсе явма Раççей Правительствин вице-премьерĕсем Аркадий Дворкович, Ольга Голодец, Игорь Шувалов тата ыттисем хутшăннă.
Чăваш Ен Пуçлăхĕ çавăн пекех «Аталанăвăн федераци тата регион тытăмĕсем: регионсем валли усси пур-и;» тата «Регион транспорт инфратытăмне уйрăм çынсем хывакан инвестицисем» «çавра сĕтелсен» ĕçне хутшăннă. Вĕсене Раççей Федерацийĕн транспорт министрĕ Максим Соколов ирттернĕ.
А.ЛЬВОВА.