Публикации » Илемлĕн юхрĕç юрăсем

Васан ял тăрăхĕн администрацийĕ тата культура ĕçченĕсем Ватă çынсен Пĕтĕм тĕнчери кунĕ тĕлне ветерансем валли хăйне евĕр интереслĕ те чылайлăха асра юлмалли мероприяти йĕркелеме шутларĕç. Сентябрĕн юлашки кунĕсенчен пĕринче, ятарласа автобус тытса, ялсенчи ветерансем «Чăваш вăрманĕ» наци паркне çитрĕç. Çак экскурси вăхăтĕнче вĕсем Баскак лесничествинчи информаци пункчĕпе, чăваш культурин «Пархатар» комплексĕпе паллашрĕç. Кун хыççăн «Эко-невидаль» арт-сукмакпа утса йывăçран тунă пĕчĕк скульптурăсем, кайăк-кĕшĕк пурăнакан тĕрлĕ йăвасем çине пăхса киленчĕç. Малалла ветерансем «Аваллăх алăкне уçса» этно-экологи сукмакĕпе утса юмахри пек илемлĕ вырăнсене курса çаврăнчĕç, «Çăка çăтмахĕ» уçланкăра пулчĕç.

Çак уçланкăра пенсионерсем техĕмлĕ чейпе, тутлă çимĕçсемпе сăйланчĕç. Йĕри-таврашри илемлĕ ÿкерчĕксем вĕсен чун-чĕринчи курăнми хĕлĕхĕсене хускатрĕç. Сумлă ветерансем хăйсен çамрăклăхĕнчи юрăсене пĕрин хыççăн теприне шăрантарчĕç. Вĕсен çепĕç юррисем вăрман тăрăх илемлĕн юхса саланчĕç.

Г.ЛАРШНИКОВ.