Публикации » Выльăхсăр картиш – пушă

  – Ахаль ларас килмест, – тет Николай Владимирович. – Ирпе вăранатăп та картише тухатăп. Выльăх-чĕрлĕхе пăхасах пулать вĕт.

Пушă мар Гладковсен витисем. Хуçисем каланă тăрăх, вĕсен хальхи вăхăтра сăвăнакан пĕр ĕне, вунă сурăх (çитес кунсенче йыш татах хутшăнмалла), сысна. Хур-кăвакал та йышлă.

Выльăх усранин усси пурах çав: аш-какайĕ те, сĕт-çăвĕ те хăвăн. Ытлашши продукцие сутма та май пур – çемье бюджечĕшĕн кашни тенкĕ шутра. Шел, сĕт хакĕ çеç пĕчĕкрех.

Калаçăва Н.Гладковăн мăшăрĕ Галина хутшăнчĕ.

– Кÿршĕсенчен юлас килмест, – терĕ вăл. – Картишре выльăх, чăх-чĕппе хур-кăвакал сасси илтĕнмесен – пурăнни-и вара;

Виçпÿрт Шăмăршăра тулли вите тытакансем татах та пур иккен. Владимир Кузьмин, сăмахран, икĕ ĕнепе икĕ вăкăр, çăвăрлаттармалли тăватă сыснапа пĕр аçа, çирĕм пуçа яхăн сурăх усрать.

В.НИКОЛАЕВ.