12 марта 2014 г.
КУЛЬТУРА çулталăкне халалланă фестивале малалла тăсса, Пăчăрлă Пашьел ял тăрăхĕн илемлĕ пултарулăх коллективĕ те тăван ял-йыш умĕнче интереслĕ программăпа тухрĕ. Концертра учительсем, медицина ĕçченĕсем, ача сачĕн воспитателĕсем, пенсионерсем, илемлĕ пултарулăха юратакан ытти çынсем ялти культура аталанăвĕн центрĕнче хăйсен тĕрлĕ енлĕ сцена ăсталăхне кăтартрĕç. Смотр-отчет концерчĕ "Иволга" тата "Вăйăра" юрăсемпе пуçланчĕ. М.Тимошкинапа Е.Чуракова солисткăсем "Синие лебеди" тата "Чĕререн тухакан сăмахсем", хĕрарăмсен ансамблĕ "Самана" юрăсене илемлĕн шăрантарчĕç. "Бичурга" тата "Ромашка" ташă ушкăнĕсем хăйсен ташшисемпе программăна татах та илемлетрĕç. Драма кружокĕн членĕсем "Паллашу кантурĕ", "Кукăльсем", "Врач патĕнче", "Галстук" инсценировкăсене ăнăçлă лартрĕç. Фойере ял çыннисем ал ĕç ăстисен япалисемпе те паллашрĕç. Уйрăмах П.Ермолаев йывăçран касса тунă, И.Угарина тĕрленĕ, К.Кудряшовапа К.Матвеева çипрен çыхнă япаласене кăмăллăн пăхса çаврăнчĕç ял çыннисем.
Т.СЕРГУНОВА.