12 марта 2014 г.
ПĔТĔМ тĕнчери хĕрарăмсен кунне халалланă тĕрлĕ мероприятисем иртрĕç Шăмăршăри "Ромашка" ача садĕнче. Тĕрлĕ ушкăнсенчи ачасен утренникĕсен программисене музыка номерĕсемпе конкурс-вăйă, ташăсем туллин кăтартма май пачĕç.Ачасем хăйсен ашшĕ-амăшне, асламăшĕ-кукамăшне, воспитательсене художество пултарулăхĕпе пысăк савăнăç кỹчĕç. Чи пĕчĕккисен "Капелька" ушкăнĕнчи ачасем "Я пеку-пеку пирог", "Мы веселые матрешки" юрăсемпе, "Поссорились-помирились" ташăпа килентерчĕç. Вĕсем амăшĕсемпе пĕрле "Чечексен çыххине пуçтар" вăйăра та вылярĕç. Вăтам ушкăнри ("Радуга") ачасем пĕчĕк сцена çине "Мы запели песенку", "Про бабушку" юрăсемпе, "Аннесем валли" ташăпа тухрĕç. Кун хыççăн "Эпĕ аннене пулăшатăп" вăйăра ăмăртрĕç. Аслă ушкăнри ("Умка") ачасем вара "Мамин праздник" юрăпа, "От улыбки" ташăпа тата ытти художество номерĕсемпе тĕлĕнтерчĕç. Хатĕрленỹ ушкăнĕнчи ("Непоседы") ачасем икĕ командăна пайланса хăйсемпе паллаштарчĕç, "Кĕмĕл сасă", "Артистка профессийĕ", "Аннен прически" конкурссенче ăмăртрĕç. Вĕсем хăйсен амăшĕсене, асламăшĕ-кукамăшне "Три желания", "Солнечные зайчики", "Бабушки-старушки" юрăсемпе те саламларĕç. Тĕрлĕ ушкăнри ачасем савăк такмаксем те каларĕç, амăшĕсене, асламăшĕ-кукамăшне открыткăсем, хăйсем тунă ал ĕç ăсталăх япалисем парнелерĕç.
О.БИБУКОВА, Шăмăршăри "Ромашка" ача сачĕн музыка ертỹçи.