12 марта 2014 г.
КАШНИ уявах хăйне евĕрлĕ ирттерме тăрăшаççĕ Виçпỹрт Шăмăршăри пуçламăш шкул-ача садĕнче ĕçлекенсем. Хĕрарăмсен кунне те тĕплĕн хатĕрленчĕç шкул çулне çитмен пĕчĕк ачасем. Уявĕ еплерех чаплă-çке - аннесене саламламалла пулать вĕт! Салам сăмахĕсемлĕ сăвăсене уççăн, сасăсене тĕрĕс кăларса калама хăнăхрĕç уявчченех пĕчĕкскерсем. Аслăрах ачасем пỹлĕмсене илемлетме те пулăшрĕç воспитательсене - тĕрлĕ чечексем каса-каса кăларчĕç. Пĕчĕккисем те (виççĕчченхи тата виççĕ-рисем группăра çиччĕн) тетĕш-аппăшĕсемпе тан открытка илемлетсе аппаланчĕç: салфеткăран ăсталанă мимоза чечекĕсене тирпейлĕ çыпăçтарчĕç пĕчĕк алăллăскерсем. Çав ачасемех открытка çинче "Анне", "Мама" сăмахсене çырса хучĕç. Аслăрах ачасем хăйсем мĕн пĕлнине пĕчĕккисене ĕçре ăнлантарса вĕрентсе тăчĕç. Акă кĕтнĕ кун çитрĕ. Аннесен умĕнче сарафан тăхăннă матрешкăсем юрăсем юрларĕç, ташларĕç. Тĕрлĕ конкурс пулчĕ уявра: ачасемпе те, аннесемпе те. Юрларĕç те ташларĕç, вылярĕç те кулчĕç. Тĕрлĕ юрăсене музыка руководителĕ В.А.Бородова ертсе пычĕ, баянпа Ф.А.Малов каларĕ. Шкул директорĕ Л.П.Краснова "Аннесен ылтăн аллисем" выставка ĕçне пĕтĕмлетрĕ: хутшăннисене Тав хучĕсемпе хавхалантарчĕ.
И.ГЛАДКОВА, ача сачĕн воспитателĕ. Виçпỹрт Шăмăршă ялĕ.