15 марта 2014 г.
Мартăн 12-мĕшĕнче районти культура аталанăвĕн центрĕнче харăсах ачасен республикăри пилĕк фестивалĕ (конкурсĕ)старт илчĕ. "Пĕчĕк çеç путене" фольклор, "Пурăн, тĕнче!" хореографи, илемлĕ вулакансен "Черчен чечексем", юрлакансен "Уçă саслă ачалăх" фестивалĕсене, "Çĕр пин тĕрĕ тăрăхĕнче" курав-конкурса районти пĕтĕмĕшле пĕлỹ паракан шкулсенчи, ача сачĕсенчи, ялсенчи клуб учрежденийĕсем çумĕнчи кружоксенчи, ача-пăча исскуство шкулĕнчи ачасем йышлăн - пурĕ 250-ăн - хутшăнчĕç. Залра ларакансем ачасен кашни номерне ăшшăн йышăнчĕç. Шупашкартан килнĕ хисеплĕ жюри вара - ун йышĕнче Республикăри халăх пултарулăхĕпе культура керменĕн директорĕ Н.Фошина, унăн çумĕсем Т.Шамсеевапа М.Чернова, пай пуçлăхĕ С.Лаврентьева, хор творчествин методисчĕ Т.Ишмуратова, декоративлă ал ĕç ăсталăх искусствин методисчĕ С.Романова, театр творчествин методисчĕ В.Григорьев пулчĕç - чи ăнăçлă номерсене гала-концерт валли суйласа илет. Гала-концерт апрелĕн 26-мĕшĕнче Шупашкарта иртет. Шăмăршăри мероприяти вĕçленсен делегаци Пуянкассинчи, Палтиелĕнчи тата Карапай Шăмăршăри культурăпа кану центрĕсенче пулчĕ. Вĕсем çак учрежденисен илемлĕ пултарулăх коллективĕсен ĕçĕ-хĕлне кăтартакан презентаципе, декораципе, ал ĕç ăсталăхĕн куравĕсемпе, чăваш наци апат-çимĕçĕпе паллашрĕç. Районти культура учрежденийĕсен ĕç-хĕлне делегаци вăтам хак пачĕ.
А.ПЕТРОВА, районти организаципе методика центрĕн заведующиĕ.