15 марта 2014 г.
ПОГРАНИЧНИКСЕН çарĕ - Хĕç-пăшаллă вăйсенче чи хисеплисенчен пĕри. Ку, паллах, ахальтен мар. Хĕлле куç курми çил-тăман çавăрттарать-и, çурхи-кĕрхи пылчăк çăрăлать-и, çулла витререн тăкнă пек çумăр шăпăртатать-и - пограничниксем хул пуççи çине автомат çакса Тăван çĕр-шыв чиккине хураллама тухаççĕ. Тулашри тăшман пирĕн çĕр-шыва тапăнса ан кĕтĕр, мирлĕ халăхсен тăнăçлăхĕ упрантăр тесе хăйсенчен мĕн килнине пĕтĕмпех тăваççĕ симĕс пакунлă чикĕ хуралçисем. Çавăнпах ĕнтĕ пограничниксем халăхра та пысăк хисепре. Пирĕн районта та Пограничниксен çарĕнче салтак тивĕçне пурнăçланă çынсем сахал мар. Запасри воин-пограничниксем çуллен, майăн 28-мĕшĕнче, хăйсен уявне паллă тăваççĕ. Паллах, вĕсен хăйсен пĕрле пуçтарăнмалли, пиртен вăхăтсăр уйрăлса кайнисене аса илсе чечек кăшăлĕсем хурса пуç таймалли сăваплă вырăн пур пулсан питĕ лайăхчĕ те. Çавăнпа та эпĕ, республикăри "Пограничниксен туслăхĕ" обществăн Шăмăршă районĕнчи пуçламăш организацийĕн ертỹçи пулнă май, патăрьелсен ырă тĕслĕхне тĕпе хурса Шăмăршăра та пограничниксене халалланă палăк лартма сĕнетĕп. Çак шухăша район администрацийĕн пуçлăхĕ В.П.Фадеев та ырларĕ, палăк лартмалли вырăна та палăртрĕ. Çак палăк районти культура аталанăвĕн центрĕ çумĕнчи илемлĕ скверта пулĕ. Пархатарлă ĕçе пуçăнассине вăраха ярас марччĕ. Ку, паллах, сисĕмлĕ тăкаксемпе çыхăннă. Палăк тăвассинче спонсорсен пулăшăвĕ те, запасри воин-пограничниксем хăйсен тỹпине хывни те пысăк пĕлтерĕшлĕ. Районти пограничниксене халалланă палăк лартассипе тата обществăн пуçламăш организацийĕн малашнехи ĕçĕ-хĕлĕпе çыхăннă ыйтусене сỹтсе явас тĕллевпе, тĕрлĕ çулсенче чикĕ хуралĕнче салтак тивĕçне пурнăçланă çынсене мартăн 21-мĕшĕнче, эрне кун, 10 сехетре Шăмăршăра, культура аталанăвĕн центрĕ умне пуçтарăнма чĕнетпĕр. Тĕп библиотекăн вулав залĕнче кун йĕркин ыйтăвĕсем тăрăх калаçăпăр.
Е.СЕТРИВАНОВ, республикăри "Пограничниксен туслăхĕ" обществăн районти пуçламăш организацийĕн председателĕ.