15 марта 2014 г.
ИРТЕÇ кунсем, иртеç çулсем... Сисместĕн те, ватлăх та çитсе тăрать. Акă ĕнтĕ ачасем те ỹссе çитĕннĕ, мăнуксем те пỹрт тулли савăнăçлă шăв-шав çĕклеççĕ. Çакăн пек вăл пурнăç саккунĕ: ачасен пенсие тухнă ашшĕ-амăшне пăхмалла, ваттисен мăнукĕсене чĕрçе çинче сиктермелле... Энтĕрьелĕнче çуралса ỹснĕ Валентин Петрович Антонов Хайпăла хĕрĕпе Валентина Филипповна Карсаковапа пĕрлешнĕренпе çак кунсенче 50 çул çитрĕ. Калама кăна вĕт! Çур ĕмĕр пĕр-пĕрне хисеплесе, ырă сунса, йывăрлăхсене пĕрле çĕнтерсе пурăннă Антоновсем. Çурт лартнă, ачасем çуратнă, сад пахчи чĕртнĕ. Валентин Петрович 37 çул хушши "Шемуршинский" совхозра водительте вăй хунă. Валентина Филипповна вара Шăмăршăри йăла ыйтăвĕсене тивĕçтерекен комбинатра (КБО) çĕвĕçре тăрăшнă. Иккĕшĕ те хăйсем ĕçленĕ коллективсенче ырă ят çĕнсе илнĕ, "Ĕç ветеранĕ" медале тивĕçнĕ. Антоновсем виçĕ ача çуратса ỹстернĕ, пурнăç çулĕ çине кăларнă. Халĕ ватăсене пилĕк мăнукпа мăнукĕн пĕр ачи савăнăç парнелеççĕ. Кунтан та пысăкрах телей пур-ши тĕнчере? Ылтăн туй ячĕпе Валентинпа Валентинăна район администрацийĕн пуçлăхĕ Тав çырăвĕпе тата асăнмалăх парнепе чысланă. Ылтăн туя пуçтарăннисем "йỹ-çĕ!" тесе кăшкăрнине хуравласа, юбилярсем пĕр-пĕр- не ачашшăн ыталарĕç, тутасем вара 50 çул каялли пекех пĕр-пĕрин çумне çепĕççĕн перĕн- чĕç...
Е.ФЕДОРОВА.