15 марта 2014 г.
"УПРА мăшăрна" текен юрра илтсен хурланса йĕрес килет. Пурăннă чухне пĕр-пĕрне мĕн кăна каламастпăр-ши?! Кỹрентерессине те пĕлместпĕр. Ĕмĕр-ĕмĕр пурăнассăн туйăнать çĕр çинче. Пĕччен юлсан вара пуç ыратиччен йĕретпĕр. Упăшка чĕрĕлсе тăрас тăк пĕрре те кỹрентермĕттĕм ăна. Тепĕр чухне нимĕн çукран чăркăшнисем те пулнă. Укçа-тенкĕ çитмесен те çатăртатса илеттĕм. Уншăн мăшăр çеç айăплă-ши? Паллах, çук. Анчах кая юлса ăнлантăм çакна. Упăшкапа хĕрĕх çул пурăнтăмăр. Ылтăн туя пĕрле ирттерме ĕмĕтленетчĕ вăл. Шел, йывăр чир ăна çемьерен уйăрчĕ. Ывăл-хĕр телейне кураймарĕ. Ултă ача çуратса ỹстертĕмĕр. Пурте ĕçчен, маттур çитĕнчĕç. Кашнийĕ хăйĕн çемйипе пурăнать халĕ. Кĕçĕннине те кин хулана илсе кайрĕ. Яла час-часах килсе çỹреççĕ пулсан та тунсăхлатăп. Эпĕ пĕччен пурăнма хăнăхман. Ман çумра яланах ача-пăча, мăшăр пулнă. Халĕ пысăк çуртра хам анчах. Пĕччен юлассине пĕлнĕ пулсан çакнашкал пỹрт лартман пулăттăмăр. Ун чухне упăшкана та, хама та йывăр килчĕ. Ачасене çитĕнтермелле, çурт тумалла. Хамăр пирки шухăшлама май та пулман. Вăл _ механизаторта, эпĕ фермăра вăй хутăм. Кил-çурт хăпартни çеç çителĕксĕр, чăх вĕçсе каçмалла мар карта-хуралтă çавăртăмăр. Кỹршĕ-аршăран юлас килмерĕ. Шел, çĕнĕ пỹртре савăнса пурăнаймарĕ упăшка, çĕре кĕчĕ. Тăрăшни харама кайрĕ. Кивĕ пỹртрех ырă-сывă мăшăрпа юнашар пурăннă пулăттăм. Пĕччен пурнăç уй-хирти тăлăх хурама евĕр. Ăна аçа та çапать, вăйлă çил те лăскать. Тепĕр чухне ыйхă вĕçет. Çын пулсан калаçса ирттерĕттĕм вăрăм каçсене. Сăмах ваклама та юлташ кирлĕ. Кун пек чухне пуçа йывăр шухăшсем пăралаççĕ, иртнине аса илтереççĕ. Малашне мĕнле пурăнмалла-ши? Кам шыв парĕ е апат пĕçерсе çитерĕ? Ачасем яла пурăнма килесси пирки шарламаççĕ. Вĕсен _ хăйсен çемйи. Чуна йăпатмалла та малалла талпăнмалла. Кỹршĕ-аршăпа пĕр чĕлхе тупма тăрăшмалла. Унран лайăх тăван тупаймастăп. Ун-кун ыратсанах вĕсем патне каçатăп, пулăшу ыйтатăп. Пỹрт умне те кỹршĕ-аршă ачи юртан тасатать. Тăван ачасем, мăнуксем хуларан килессе кĕтсен юр айнех пулатăп. Хĕрарăмсем, упăшкăрсене упрама пĕлĕр! Пурнăç çулне мăшăрпа утса тухнинчен лайăххи, сăвапли нимĕн те çук. Пĕр-пĕринпе тату пурăнăр!
МАРИЯ ИВАНОВА.