15 марта 2014 г.
РАЙОН территорийĕнчи çул-йĕрсем çинче хăрушсăрлăх йĕркисем мĕнлерех пурнăçланса пынине полицин районти уйрăмĕн ГИБДД сотрудникĕсем яланах тимлĕхре тытма тăрăшаççĕ, профилактика ĕçне те манăçа хăвармаççĕ. Кăçал 2 уйăхра район территорийĕнче 1 авари пулнине, пĕр çын аманнине шута илнĕ. Февраль уйăхĕнче авари пулман. Анчах та ку - лăпланса лармалли сăлтав мар. Водительсене те, çуран çỹрекенсене те яланах тимлĕх пирки шутламаллине аса илтеретпĕр. Водительсен хăвăртлăхпа дистанци йĕркисене çирĕп пурнăçламалла, тепĕр транспортран иртсе кайнă чухне те асăрхануллă пулмалла. Инкек тени пĕр самантрах пулса иртме пултарать. Çуран çỹрекенсен çул урлă каçнă чухне икĕ еннелле те пăхса илмелле. Çывăхра транспорт хатĕрне асăрхасан тăхтаса тăмалла. Федераллă пĕлтерĕ- шлĕ автоçул урлă каçнă чухне тимлĕхе ỹстермелле. Хăрушсăрлăх йĕркисем пирки ашшĕ-амăшĕн ачасене час-часах аса илтермелле. Ман шутпа, шкулсенче те профилактика ĕçне вăйлатмалла. Çул-йĕр правилисем çинчен хутран-ситрен çеç калаçни çителĕксĕр, ăнлантару ĕçне кашни эрнерех туса пымалла. Уйрăмах кĕçĕн классемпе тимлĕ пулмалла. 2014 çулхи январь - февраль уйăхĕсенче çул-йĕр хăрушсăрлăх инспекцийĕн сотрудникĕсем пурĕ 309 административлă протокол çырнă. Çак шутран 14-шĕ - водительсем руль умне ỹсĕрле ларнипе, 63-шĕ - хăрушсăрлăх пиçиххине çыхманнипе, 8-шĕ - водитель çуран çỹрекене палăртнă вырăнта çул паманнипе, 23-шĕ - çуран çỹрекенсем çул-йĕр правилине пăснипе, 10-шĕ штраф суммине вăхăтра бюджета хывманнипе çыхăннă. Пĕлтĕрхипе танлаштарсан, кăçал 2 уйăхра руль умне ỹсĕрле ларакансен шучĕ кăштах чакнă (пĕлтĕр çак тапхăрта çакнашкал 18 факта регистрациленĕччĕ). Ку ырă пулăм малалла та пырсан питĕ лайăх пулĕччĕ. Ỹсĕр водительсем сахал мар авари тăваççĕ, вĕсен айăпне пула çынсем вилеççĕ, аманаççĕ. Сăмах май, март уйăхĕнче "Ỹсĕр водитель" профилактика операцийĕ иртесси пирки те пĕлтеретпĕр. Республикăри профилактика операцийĕсем пирки уйрăммăн каласан, мартăн 14-мĕшĕнче "Автобус" операци иртни пирки асăнса хăварас килет. Мартăн 18-мĕшĕнче - "Ачасем", 28-мĕшĕнче "Пысăк габаритлă, йывăр та хăрушă груз" операцисем пулаççĕ. Çак операцисене йĕркеллĕ, усăллă ирттерес, граждансене çул-йĕр хăрушсăрлăхĕпе тивĕçтерес тесе мĕн пур вăя хурса ĕçлĕпĕр.
Г.ИВАНОВА, полицин çул-йĕр хăрушсăрлăхĕн инспекторĕ.