26 февраля 2014 г.
Районта ялсенчи илемлĕ пултарулăх коллективĕсен Культура çулталăкне халалланă фестивалĕ малалла пырать. Сцена çине чăн малтан Палтиел ял тăрăхĕнчи хăй тĕллĕн вĕреннĕ артистсем тухрĕç. Чăваш, тутар, вырăс, ирçе халăхĕсен ташши-юрри чун-чĕрене хумхантарчĕ. Хор "Шурă Шупашкарăм" юрра пысăк ăсталăхпа шăрантарчĕ. "Акăшпи" фольклор ушкăнĕн пултарулăхне те куракансем пысăка хурса хакларĕç. Долговсемпе Макаровсен çемье ансамблĕсем, Л.Альда, Г.Садетдинова, С.Невметова юрăçсем, хĕрарăмсен "Çăлкуç" ансамблĕ, ачасен "Ивушка" ташă ансамблĕ тата ыттисем куракансен чĕрисене тыткăна илчĕç. Фойере ялти ал ĕç ăстисен выставкине йĕркеленĕччĕ. Куракансем Д.Шафигуллинан, Б.Севрюгинăн, В.Селиванован япалисене лайăх хак пачĕç.
Л.АЛЬДА.