26 февраля 2014 г.
Чăн-чăнни ăçта вара? Тахçантанпах курман пĕлĕшĕме тĕл пултăм. Ас тăватăп-ха: ял хуçалăх управленийĕнче, каярахпа почтăра ĕçленĕ чух вăл Шăмăршăри арçынсен халăх хорĕнче юрлатчĕ. _ Саланчĕ çав пирĕн хор, _ ассăн сывларĕ пĕлĕшĕм. _ Юрлакансем айăплă мар кунта, эпир паян тесен паян çĕнĕрен пуçтарăнма хатĕр. Арçынсен хорĕн хурлăхлă шăпи пирки пăшăрханса калаçнине эпĕ ытти çынсенчен те илтнĕ. Мĕншĕн саланчĕ-ха вăл? Е никама та кирлĕ мар-и? Районти культура аталанăвĕшĕн тỹрремĕнех яваплă çынсем ман ыйту çине мĕнле хурав парĕç-ши? Тепĕр ыйту _ вăл та чи çивĕччисен шутĕнче _ баянист çукки. Ыйтса пĕлĕр-ха ял тăрăхĕсен пуçлăхĕсенчен: отчет-смотра хатĕрленнĕ чух баянист шыраса ăçта кăна çитмеççĕ-ши, кам умĕнче кăна пуç çапмаççĕ-ши? Енчен те районти культура аталанăвĕн центрĕн штатĕнче пĕр баянист пулнă пулсан, ăна тивĕçлĕ шалу тỹлесен çак нушаран хăтăлма пулĕччĕ, теççĕ вĕсем. _ Паян баян та, купăс та кирлĕ мар, юрăçсем фонограммăпах хитре шăрантараççĕ, çамрăксем ташша яраççĕ, _ хирĕçлеççĕ теприсем. Апла пулсан, тен, юрăçсем те кирлĕ мар? Паллă артистсем юрланине çырса илер те, кĕрлеттерер çеç уявсенче! Тăкакĕ те сахал, культура мероприятийĕ чаплă иртрĕ теме те пулать. Анчах чăн-чăн культурах-ши ку? Миçе çул хушши ĕнтĕ Шăмăршăра халăх инструменчĕсен оркестрне йĕркелемелли çинчен калаçатпăр, оркестр паян кун та çук. Кашăкçăсен ансамбльне туса хума май çук-и вара? Пирĕн музыка шкулĕ те (халĕ ăна ача-пăча искусство шкулĕ теççĕ) вун-вун ачана ăсталăх çулĕ çине кăларма пултарать. Анчах ăçта вĕсем, пултаруллисем? Баян калама çын тупаймастпăр пулсан, уявсенче фонограмма шăв-шавĕпе çеç ташша çапатпăр пулсан, хамăрăн ĕçпе мухтанма пултараятпăр-ши? "Районти "халăх" ята тивĕçнĕ ултă коллективран тăваттăшĕ, специалистсем çуккипе, хисеплĕ ята хỹтĕлеймерĕ", _ çак сăмахсене эпĕ культура ĕçченĕсен тĕп пухăвĕнче туса панă отчетлă докладран илтĕм. Хурлăхлă чан çапмалла çак сăмахсем хыççăн, юлташсем! Эпир вара... фонограмма янăраттаратпăр. Культура çулталăкĕ вĕт...
ИВ.САЛАНДАЕВ.