30 апреля 2014 г.
Иртнĕ шăмат кун район администрацийĕн пуçлăхĕ В.П.Фадеев Васан ял тăрăхĕн территорийĕнче ял тăрăхĕсен пуçлăхĕсемпе тата уйрăм организацисен пуçлăхĕсемпе вырăна тухса канашлу ирттерчĕ. Канашлури тĕп ыйту - ялсене тирпей-илем кỹресси, хĕл каçа пухăннă çỹп-çапа тасатасси, экологи субботникĕсене пĕтĕм халăха явăçтарасси. Канашлăва килнисем малтанах Васанти Киров урамĕн вĕçĕнчи юхăннă кĕпер умне пухăнчĕç. Юхан шывăн икĕ енĕпе те тĕрлĕ ăпăр-тапăр пăрахса тултарни, паллах, яла илем кỹмест. Субботник йĕркелесе çак свалкăна çывăх вăхăтрах тасатасчĕ. Ярăславра вара хăш-пĕри чи сăваплă вырăн - чиркỹ çывăхне çỹп-çап килсе тăкма та именсе тăман. "Кил умĕ таса пултăр, ытти - тем мар", - тенĕ-ши? Тăкăрлăксенче те çỹп-çап куписем курăнкалаççĕ. Пуянкасси ял тăрăхне кĕрекен Хайпăлана та çитсе курчĕç канашлăва килнисем. Ку ялта хăш-пĕр кил умĕнче ăпăр-тапăр сапаланса выртни курăнчĕ. Пĕр çурт умĕнче техникăна унта-кунта лартнă. Масар çумĕнчех каснă йывăç тураттисем йăваланса выртаççĕ. Ферма çывăхĕнче такамсем свалка уçнă. В.П.Фадеев палăртнă тăрăх, ялсенче хăш-пĕр улшăнусем пур. Çав вăхăтрах туса пĕтермен ĕçсем те тем чухлех. Ял тăрăхĕ-сен пуçлăхĕсен саккунсăр свалкăсем тĕлĕнчен лăпкă чунпа иртсе каймалла мар, айăплисене тивĕçлĕ явап тыттармалла. Çырма-çатра хĕррисенчи, çул аяккинчи, вăрман тăрăхĕсенчи çỹп-çап куписем те тăван тавралăх илемне пăсаççĕ. Тирпей-илеме камăн тумалла-ха? Хамăрăнах мар-и вара? Май уявĕсем умĕн кашни ялта, кашни урамра, кашни предприятипе организацире, учрежденире тепĕр хут субботниксем йĕркелесчĕ, йĕри-тавралăха тирпей-илем кỹресчĕ.
И.АНАНЬЕВ.