28 июня 2014 г.
Республика кунне уявлама тĕрлĕ регионтан хастар чăвашсем çитрĕç. Çак пулăмпа усă курса Чăваш наци конгресĕ июнĕн 23-мĕшĕнче Мăн Канаш ларăвне ирттерчĕ. Тĕпрен илсен унăн кун йĕркинче регионсен хушшинчи обществăлла организацийĕн Уставне сỹтсе явас ыйту пулчĕ. Ларăва ЧНК Президенчĕ Н.Угаслов уçрĕ. Малтанах ĕç органĕсене - президиума, секретариата, редакци тата шутлав комиссийĕсене çирĕплетрĕç. - Чăваш наци конгресĕн VIII Аслă Пухăвĕнче организацин Уставне çĕнетмелли çинчен ыйту хускатнăччĕ. Унти хăш-пĕр пункт паянхи саккунсемпе килĕшсе тăманни паллăччĕ. Ку ĕçе вăраха тăсмалла маррине ăнланатпăр: саккунпа килĕшсе тăман документлă пĕрлешĕвĕн шăпи иккĕленỹллĕ. Кĕске хушăра ЧНК Президиумĕпе ятарлă комисси Уставăн çĕнĕ редакцине хатĕрлерĕç. Ку енĕпе комисси членĕсене Николай Лукианова тата Александр Павлова уйрăммăн тав тăватăп, - терĕ Конгресс ертỹçи Н.Угаслов. Мăн Канашăн ларăвĕнче Чăваш наци конгресĕн çĕнĕ йышне çирĕплетес ыйтупа та хĕрỹ калаçрĕç. Ĕç-хĕле тухăçлăрах йĕркелес тĕллевпе Президиумăн йышне Чăваш Республикин ертỹлĕхĕнчи çынсене те - вĕренỹ министрне В.Иванова, культура министрне В.Ефимова, информаци политикипе массăллă коммуникацисен министрне В.Андреевăна, экономика аталанăвĕн министрне В.Аврелькина - кĕртме йышăнчĕç. Кăнтăрла иртсен, Аслă Пуху ĕçлерĕ. Унта ЧР культура тата вĕренỹ министрĕсем В.Ефимовпа В.Иванов, ЧР Патшалăх Канашĕн депутачĕсем, чăвашлăхшăн çунакан хастарсем хутшăнчĕç. Съездра сỹтсе явмашкăн тăратнă тĕп ыйтусенчен пĕри - Мăн Канашра пăхса тухнă Устав проектне йышăнасси. Ăна улăштарни пурнăç ылмашăнса пынипе çыхăннă. Конгресăн саманапа тан утмалла. Унсăр пуçне РФ политика тата право тытăмĕ хăвăрт улшăнса çĕнелет. Конгресс çĕр-шыв тата республика саккунĕсемпе килĕшỹллĕн, тĕнче правине шута илсе ĕçлесе пырать. Чăваш халăхĕ хăй те улшăнчĕ. Ытти халăх пекех вăл тĕрлĕ енлĕ аталану çул-йĕрĕ шырать. Делегатсен нумай шухăшне, сĕнĕвне тĕпе хурса Чăваш наци конгресĕн çĕнетнĕ Уставне пĕр саслă пулса йышăнчĕç. Съезд ĕçне пирĕн районтан И.Саландаев, Г.Ларшников тата Т.Давыдова делегатсем хутшăнчĕç.
И.ИВАНОВ.