09 августа 2014 г.
Преступлени тунă çынна судра тивĕçлĕ айăплав парассинче свидетель кăтартăвĕсем пысăк пĕлтерĕшлĕ. Анчах та тỹнтерле ĕç тунисенчен хăшĕ-пĕри суд сакки çине ларассинчен пăрăнма, свидетеле хăратма пăхать. Кун пек чухне полици уйрăмĕ, 2004 çулхи 119-мĕш номерлĕ федераллă саккунпа килĕшỹллĕн ("О государственной защите потерпевших свидетелей и иных участников уголовного судопроизводства") çакнашкал лару-тăрăва лекнĕ свидетеле хăйĕн хỹтлĕхне илет. Полици сотрудникĕсем свидетеле кунĕн-çĕрĕн хỹтлĕхре тытаççĕ, пĕрлех унăн кил-çуртне те. Енчен те преступлени тунă çын свидетеле хăратать пулсан, кун пирки полици уйрăмĕн дежурнăй чаçне 2-33-73 номерпе шăнкăравлама ыйтатпăр. Сотовăй телефонпа 020 номерпе пĕлтерме пулать. Преступлени тунине курнă, тỹнтерле ĕç пулса иртнине следователь патĕнче тата суд ларăвĕнче çирĕплетме пултаракан свидетеле хăш-пĕр преступник хăйĕн чи хăрушă тăшманĕ вырăнне хурса йышăнать, ăна "курман-илтмен" тесе калама хушать. Итлемесен, свидетеле хăратма пуçлать, çак хура ĕçе хăйĕн юлташĕсене те явăçтарма пултарать. Анчах свидетелĕн хăрама кирлĕ мар, вăл - саккун хỹтлĕхĕнче. Свидетеле хăратнăшăн вара РФ УКĕн 294,295,302,309 статйисенчен пĕринпе (мĕнле майпа хăратнине шута илсе) айăплаççĕ. Срокĕ те пĕчĕкех мар - 2 çултан пуçласа 12 çул таранах. Судра вара малтан тунă преступлени срокĕ çумне свидетеле хăратнăшăн паракан статья та хутшăнать.
Р.ИДРИСОВ, полицин районти уйрăмĕн начальникĕн çумĕ.