27 августа 2014 г.
"Тĕнче аналитикĕсемпе футурологĕсем çирĕплетнĕ тăрăх - 2020 çулсенче медиксем этем тĕртĕмне пулăшмашкăн юна наноробот яраççĕ, 2030 çулсен вĕçĕнче çын ăс-тăнĕн резерв копине хатĕрлеме тытăнаççĕ. Пуласлăхра компьютерпа мар, виртуаллă тĕнчен çĕнĕ йышши хатĕрĕпе усă курма тытăнăпăр... Тепĕр 50 çултан этемлĕхе мĕн кĕтет? Çакăн 5 процентне кăна пĕлетпĕр эпир. Пачах урăхла шухăшлакан çын кăна тĕнчене капаш улшăнусем кĕртĕ. Нанотехнологи ĕмĕрĕнчи тĕп пĕлỹ математикăпа тỹрремĕнех çыхăннă, анчах гуманитарие шута хума пăрахмаллине пĕлтермест ку",- палăртнă ЧР вĕренỹ министрĕ Владимир Иванов республикăри педагогика ĕçченĕсен конференцийĕнче. "Вĕренĕве бюджетран 32,5 процент укçа уйăраççĕ. Тепĕр майлă каласан: патшалăхăн кашни виççĕмĕш тенки - çак тытăмра. Ку тăкаксен чи пысăк пайĕ", - палăртнă асăннă конференцире ЧР Пуçлăхĕ Михаил Игнатьев. Вĕренỹ учрежденийĕсенчи пысăк улшăнусем куç умĕнчех. Педагогсен шалăвне ỹстерессине те куçран вĕçертмеççĕ. "Çапах та вĕрентĕвĕн тĕп фончĕ - кадрсем", - çирĕплетнĕ республика ертỹçи. РФ Президенчĕн хушăвĕпе килĕшỹллĕн октябрь уйăхĕн 9-11-мĕшĕсенче Шупашкарта "Раççей - спорт çĕр-шывĕ" тĕнче шайĕнчи спорт форумĕ иртнине те аса илтернĕ. Наци сывлăхне тĕпчекенсен кăтартăвĕпе те паллаштарнă Михаил Васильевич: вĕренỹ тытăмĕнче ĕçлекенсен 1,3 проценчĕ кăна туртать. Усал йăлана пăрахайман ертỹçĕсенчен ỹлĕмрен çирĕпрех ыйтасшăн. "Çук тăк - сире урăх ĕç тупма пулăшăпăр", - тенĕ вăл. Чăваш Ен Пуçлăхĕн Указĕпе килĕшỹллĕн вĕренỹ тытăмĕнче çĕнĕлле, пултарулăха тĕпе хурса ĕçлекен 20 учреждени 200 пиншер тенкĕлĕх гранта тивĕçнĕ.